سااكاشۆيلي جاقتاستارى پوروشەنكونىڭ وتستاۆكاعا كەتۋىن تالاپ ەتتى

ميحايل سااكاشۆيلي جاقتاستارى پەتر پوروشەنكونىڭ وتستاۆكاعا كەتۋىن تالاپ ەتتى – دەپ حابارلايدى امەريكا داۋسى اقپارات اگەنتتىگى.

اگەنتتىك مالىمەتىنشە، اقپان ايىنىڭ 18-ءى كۇنى ميحايل سااكاشۆيلي جاقتاستارى كيەۆ قالاسىنىڭ ورتالىعىندا ەل پرەزيدەنتى پەتر پوروشەنكونىڭ وتستاۆكاعا كەتۋىن تالاپ ەتىپ قارسىلىق اكتسياسىن وتكىزگەن. شەرۋگە قاتىسۋشىلاردىڭ اراسىندا ءبىر توپ ۋكراينا ۇلتشىلدارى بولعان. ولار قارسىلىق اكتسياسى اياقتالعاننان كەيىن ەكى رەسەيلىك بانك پەن «رەسەي ارىپتەستىك» كومپانياسىنىڭ عيماراتىنا شابۋىل جاساعان.

ەستەرىڭىزگە سالايىق، 12 اقپان كۇنى ميحايل سااكاشۆيلي كيەۆ قالاسىندا ۇستالىپ پولشاعا دەپورتاتسيالانعان بولاتىن. كەيىننەن ول ءوزىنىڭ ۋكراينا اۋماعىنان دەپورتاتسيالانۋىنىڭ ارتىندا ەل پرەزيدەنتى پەتر پوروشەنكو تۇرعاندىعىن ايتىپ، گەرمانيا كانتسلەرى انگەلا مەركەل مەن ەۋرووداقتان كومەك سۇراعان.

“The Qazaq Times”