فوتو: گوردون

تۇركيا اقش-قا ءسۇريا اۋماعىندا بىرلەسكەن اسكەري كونتينگەنت قۇرۋدى ۇسىندى – دەپ حابارلايدى ۆۆس اقپارات قىزمەتى.

اگەنتتىك مالىمەتىنشە، اقپان ايىنىڭ 15-ءى كۇنى تۇركيا پرەزيدەنتى رەجەپ تايىپ ەردوعان انكارا قالاسىندا اقش-تىڭ مەملەكەتتىك حاتشىسى رەكس تيللەرسوندى قابىلداعان. وندا قوس تاراپ ءسۇريا ماسەلەسى مەن ءوزارا ارىپتەستىك جونىندە كەلىسسوزدەر جۇرگىزگەن. كەلىسسوزدەردەن كەيىن تۇركيا سىرتقى ىستەر ءمينيسترى ماۆليۋت چاۆۋشوعلى جۋرناليستەر الدىندا مالىمدەمە جاساعان. وندا ول: «تۇركيا اقش-قا مانبيدج قالاسىنان كۇرد جاساقتارىن شىعارىپ، ءسۇريانىڭ سولتۇستىك اۋداندارىنا بىرلەسكەن اسكەري كونتينگەنت كىرگىزۋدى ۇسىندى. ءبىز ءۇشىن ايماق قاۋىپسىزدىگىن كىمنىڭ قامتاماسىز ەتەتىنى وتە ماڭىزدى» - دەگەن. ال ءوز كەزەگىندە رەكس تيللەرسون: «ءبىز تۇركيانىڭ ءوز شەكاراسىن قورعاۋى دۇرىس دەپ ەسەپتەيمىز. ءبىز بۇعان دەيىن تۇركياعا مانبيدج قالاسىنان كۇرد جاساقتارىن شىعارامىز دەپ ۋادە بەرگەنبىز. بىراق ول ۋادەمىزدى ورىنداعان جوقپىز. الداعى ۋاقىتتا ءبىز وسى باعىتتا جۇمىس ىستەيتىن بولامىز» - دەپ مالىمدەگەن.

ەستەرىڭىزگە سالايىق، 20 قاڭتار كۇنى تۇركيا ءسۇريانىڭ افرين اۋماعىنا اسكەر كىرگىزىپ، «ءزايتۇن بۇتاعى» وپەراتسياسىن باستاعان بولاتىن. رەسمي انكارانىڭ بۇنداي قادامدارعا بارۋىنا اقش-تىڭ «ءسۇريا اۋماعىندا شەكارا قاۋىپسىزدىگىن قامتاماسىز ەتەتىن ارنايى جاساق قۇرامىز» - دەگەن مالىمدەمەسى سەبەپ بولعان.

“The Qazaq Times”