مەككە مەن مەدينە اراسىنداعى جول ءبىر ساعاتقا قىسقاردى

مۇسىلماندار ءۇشىن قاسيەتتى سانالاتىن مەككە مەن مەدينە قالالارىنىڭ اراسىندا جۇردەك پويىز قاتىنايتىن بولدى. ساۋد ۇكىمەتى جۇردەك پويىز جولىنىڭ جوباسىن اياقتاپ، سىناق مەرزىمىنىڭ باستالعانىن مالىمدەدى. بۇل تۋرالى «انادولى» اقپاراتتىق اگەنتتىگى حابارلادى.

ساعاتىنا 300 شاقىرىمدىق جىلدامدىقپەن جۇرەتىن جۇردەك پويىز مەككە، جيددا، كورول ابدۋلازيز اتىنداعى حالىقارالىق اۋەجاي، كورول ابدۋللا قالاسى جانە مەدينا قاتارلى بەس ايالداما اراسىندا قاتىنايتىن بولادى. ساۋد ارابياسىنىڭ ازاماتتارىنا جانە قاجىلارعا قىزمەت كورسەتەدى.

مەككە مەن مەدينا اراسىنداعى 450 شاقىرىم قاشىقتىقتا قاتىنايتىن جۇردەك پويىزدىڭ سىناق مەرزىمى باستالدى. سىناق ۋاقىتى ءساتتى اياقتالاتىن بولسا، پايدالانۋعا بەرىلەدى دەيدى پاتشالىق ۇكىمەت.

“The Qazaq Times”