قىتايدا اۆتوكولىك ءوندىرىسى قۇلدىراۋعا بەت الدى

وڭتۇستىك كورەيانىڭ Hyundai Motor Group اۆتوكولىك ءوندىرۋشى الىبى سارسەنبى كۇنى مالىمدەمە جاساپ، قىتايداعى مەرزىمى ەڭ ۇزاق جانە العاشقى زاۋىتىنىڭ جۇمىسىن توقتاتاتىنىن حابارلادى.

قىتاي Hyundai ءۇشىن ەڭ ۇلكەن بازار بولاتىن، الايدا بىلتىر Hyundai كولىكتەرىنىڭ قىتايداعى ساتىلىمى كۇرد ازايدى. ءتىپتى، قىتاي بازارىنا ساتىلاتىن كولىكتەرىنىڭ جارتىسىنا جۋىعى وتپەي قالدى.

Hyundai Motor Group كومپانياسىنىڭ ايتۋىنشا، كومپانيا باسەكەگە قابىلەتتىلىكتى ارتتىرۋ جانە ونىمدىلىك تۇرعىسىنان ءوندىرىستى رەتتەۋ ماقساتىندا «بەيجىڭ Hyundai Motor Co.، Ltd.» العاشقى زاۋىتىنىڭ ءوندىرىسىن توقتاتا تۇرۋعا شەشىم قابىلداعان. بىراق، بۇل اتالعان زاۋىتتى تولىقتاي جاۋىپ تاستاۋ ەمەس ەكەنىن ايتقان.

«بەيجىڭ Hyundai Motor Co.، Ltd.» 2002 جىلى قۇرىلعان، ول قىتاي دسۇ-عا مۇشە بولعاننان كەيىن قىتايمەن ىنتىماقتاستىق ورناتقان العاشقى شەتەلدىك كومپانيا. ونىڭ بەيجىڭدە اۆتوبولشەكتەر جاسايتىن ءۇش زاۋىتى بار.

ەكونوميكاسىنىڭ ءوسۋ قارقىنىنىڭ باياۋلاۋى جانە اقش-قىتاي ساۋدا سوعىسىنا بايلانىستى قىتايداعى اۆتوكولىك ونەركاسىبى بىرتە-بىرتە باسەڭدەۋدە. قىتايداعى ەكونوميكالىق ساياساتتارعا بايلانىستى شەتەلدىك كومپانيالار قىتايدان بىرتىندەپ شىعا باستادى. ونىڭ ۇستىنە، قىتاي مەن وڭتۇستىك كورەيا اراسىنداعى ساياسي داۋ-دامايعا بايلانىستى قىتاي نارىعىندا كورەيالىق ونىمدەرگە دەگەن سۇرانىس ازايعان. كەي ساراپشىلار، بۇنى قىتاي بيلىگى جاعىنان ۇيىمداستىرىلعان دەمونستراتسيا رەتىندە باعالايدى.

“The Qazaq Times”