ەۋروپانىڭ ەۆرەي كوشباسشىلارى يسلانديادا ەر بالالاردى سۇندەتكە وتىرعىزۋعا تىيىم سالۋ تۋرالى زاڭ جوباسىن قۇپتامادى. جاقىن ارادا يسلانديا پارلامەنتىندە اتالعان زاڭ جوباسىنىڭ "قاڭقاسى" ازىرلەنبەك. بۇل يۋدايزمگە قارسى ارەكەت بولىپ سانالادى، - دەپ حابارلايدى Euronews اقپارات اگەنتتىگى.

ەر بالالاردى سۇندەتكە وتىرعىزۋعا تىيىم سالاتىن زاڭ جوباسىن جەرگىلىكتى پارتيا وكىلى سيليا دەگگ گۋننارسدوتتير  (Silja Dögg Gunnarsdóttir ) ۇسىندى، بىرنەشە يسلانديالىق ساياساتكەرلەر ونى قولداي كەتتى.

قىزداردى سۇندەتكە وتىرعىزباۋ تۋرالى زاڭ ەلدە 2005 جىلى قابىلدانىپ قويعان، ال ەر بالالارعا قاتىستى سونداي زاڭ جوق، - دەيدى سيليا دەگگ.

ۇسىنىلعان زاڭ جوباسى "بالانىڭ جىنىس مۇشەسىنىڭ بولىگىن نەمەسە تولىقتاي الىپ تاستاعان" ادامعا 6 جىلعا باس بوستاندىعىنان ايىرۋ جازاسىن قولدانۋدى ۇسىنادى.

بىراق ءدىني كوشباسشىلار - ەۆرەي جانە كاتوليك قاۋىمداستىعىنىڭ وكىلدەرى بۇل جوسپاردى سىنعا الدى.

سكانديناۆيالىق ەلدەردەگى ەۆرەي قاۋىمداستىقتارى: "بۇل زاڭ قابىلدانسا، باۋىرلارىمىزعا يسلانديادا قونىستانۋىنا جول بەرمەيمىز. يسلانديا ەۆرەي ءداستۇرىنىڭ ەڭ ماڭىزدى ادەت-عۇرپىنا زاڭدىق نەگىزدە تىيىم سالاتىن جالعىز ەل اتانباق. ءيۋدايزمدى دە، ءدىني ادەت-عۇرىپتارىمىزدى دا تۇبەگەيلى جويۋعا تىرىسقاندار ەۆرەيلەر تاريحىندا ارقاشان بولعان. بۇل حاتتى يسلانديانىڭ ىشكى شارۋاسىنا ارالاسۋ دەپ تۇسىنبەڭىزدەر. بۇل زاڭ جوباسى بۇكىل الەمدەگى ەۆرەيلەرگە قاتىسى بار يۋدايزمگە قارسى ارەكەت ەكەنىن ايتقىمىز كەلەدى. الەمدە قانداي دا ءبىر مەملەكەت ءوزىنىڭ اۋماعىندا حريستيان ءدىنىن ۇستاناتىندار تۇرماعان كۇننىڭ وزىندە حريستيان دىنىندەگى نەگىزگى مەيرامدى تويلاۋعا تىيىم سالسا، الەمنىڭ تۇكپىر-تۇكپىرىندەگى حريستاندار ءدال وسىلاي ارەكەت ەتەتىنىنە سەنىمدىمىز", - دەپ وتىر.

گۋننارسدوتتيردىڭ ايتۋىنشا، يسلانديادا يسلام مەن ءيۋدايزمدى ۇستاناتىن حالىق ونداي كوپ ەمەس، بىراق ۋاقىت وتە كەلە ولاردىڭ سانى جىلدام ءوسىپ كەلە جاتىر. سونىمەن قاتار ونىڭ ويىنشا، ءدىني نەگىزدە ەر بالالاردى سۇندەتكە وتىرعىزۋ بولعانعا دەيىن ونى ەشكىم بىلمەگەن دە كورىنەدى.

ء"بىز بار بولعانى بالالاردىڭ قۇقىعىن قورعاعىمىز كەلەدى. ءار ادام تاڭداۋىن ءوزى جاساۋ كەرەك. ەلىمىزدە، مىسالى، كىم قانداي ءدىن ۇستانام دەسە دە، وعان ەشقانداي شەكتەۋ جوق قوي. بىراق اڭگىمە ءۇشىنشى تاراپقا قاتىستى بولعاندا ءسىزدىڭ ءدىني كوزقاراسىڭىز ماڭىزدى بولماۋ كەرەك. سول سياقتى بۇلدىرشىندەر دە ءوز تاڭداۋلارىن ەسەيگەن شاعىندا جاساۋ كەرەك", - دەيدى پارلامەنت مۇشەسى سيليا دەگگ گۋننارسدوتتير.

گۋننارسدوتتير سكانديناۆيالىق 5 ەلدىڭ ومبۋدسمەندەرىنىڭ ۇسىنىسىنا سايكەس ارەكەت ەتىپ جاتقانىن ايتتى. ولار 2013 جىلى "بارلىق مەديتسينالىق كورسەتكىشتەر ەسكەرىلمەي، شىنايى كەلىسىمگە كەلمەي بالانى سۇندەتكە وتىرعىزۋ بىرىنشىدەن مەديتسينالىق ەتيكاعا ساي كەلمەيدى. ەكىنشىدەن، بۇل وپەراتسيا ورنى تولمايتىن، وتە اۋىر سالدارعا اكەلۋ مۇمكىن" دەگەن بولاتىن.

“The Qazaq Times”