فوتو: پەتروپاۆلوۆسك kz

سولتۇستىك قازاقستان وبلىسىنىڭ اكىمى قۇمار اقساقالوۆ پەتروپاۆل قالاسى اكىمى مارات تاسماعانبەتوۆتىڭ قورىتىندى ەسەپتىك كەزدەسۋىنە قاتىستى. ءوڭىر باسشىسى قالا اكىمىنە بىرقاتار تاپسىرمالاردى جۇكتەدى، دەپ حابارلادى اكىمدىكتىڭ ءباسپاسوز قىزمەتى.

ونىڭ ءبىرى قالا ماڭىندا ازىق-تۇلىك بەلدەۋىن قۇرۋ. جىل سايىن وڭىرگە 13 ملرد تەڭگەنىڭ ءونىمى اكەلىنەدى. ونىڭ 80 پايىزىن پەتروپاۆل تۇرعىندارى تۇتىنادى.

«ءبىرىنشى كەزەكتەگى تاۋارلاردى ءبىز ءوزىمىز ءوندىرۋىمىز كەرەك. ءسويتىپ، باعانى ۇستاپ تۇرا الامىز. بۇل قالا اكىمىنىڭ باستى مىندەتى. بۇل ماسەلەنى اۋدان اكىمدەرىمەن بىرلەسىپ شەشۋ كەرەك»، - دەدى قۇمار اقساقالوۆ

پەتروپاۆلدا بيىل تەك ءبىر عانا ءىرى كاسىپورىن ىسكە قوسىلماقشى. بۇل ازدىق ەتەدى دەدى ءوڭىر باسشىسى. اسىرەسە، ونەركاسىپ ايماعىندا بوس تۇرعان 30 شاقتى عيماراتتى قالىپقا كەلتىرىپ، جاڭا ءوندىرىس وشاقتارىن اشۋ قاجەت. تيىسىنشە، جاڭا جۇمىس ورىندارى پايدا بولادى.

بيىل تۇرعىن ءۇي قۇرىلىسىنا دا قارقىن قوسىلادى. بىلتىر 1000 پاتەر قولدانىسقا بەرىلسە، بيىل 1223 وتباسى قونىس تويىن تويلايدى. الايدا، قارقىندى قۇرىلىس ۇيلەردىڭ ساپاسىنا نۇقسان كەلتىرمەۋ كەرەك.

«مەن تۇرعىنداردان سالىنعان باسپانا تالاپقا ساي ەمەس دەگەندى ەستيمىن. پاتەرلەر سۋىق، قاجەتتى قۇرىلىس ماتەريالدار قولدانىلمايدى. قوعامدىق باقىلاۋ كەرەك. مىندەتتەرىن دۇرىس اتقارماعان قۇرىلىس كومپانيالارىن قارا تىزىمگە ەنگىزەمىز»، - دەدى ايماق باسشىسى.

بيىل قالادا ساياباقتار دا كوبەيەدى، بۇل باعىتقا قارجى قاراستىرىلدى. بىلتىر 106 اۋلانى اباتتاندىرۋ بويىنشا اۋقىمدى جۇمىس جۇرگىزىلدى. بيىل بۇل باعىتقا رەكوردتىق 600 ملن تەڭگە باعىتتالماق.

«بيىل ءبىز وسى باعىتقا ارنايى قارجى ءبولىپ، 200 اۋلانى قالىپقا كەلتىرەمىز. بۇعان جاڭا جىلدىق بەزەندىرۋدەن جينالعان قاراجات دا باعىتتالادى»، - دەپ اتاپ ءوتتى وبلىس اكىمى.

بيىل پەستروە كولىنىڭ جاعاجايى دا كەڭەيتىلىپ، اباتتاندىرىلادى.

“The Qazaq Times”