وڭتۇستىك كورەيا پرەزيدەنتى Moon Jae-in جانە Kim Yo Jong.

سولتۇستىك كورەيانىڭ ەڭ جوعارى باسشىسى كيم جوۋ ۋننىڭ (Kim Jong Un/كيم چەن ىن) قارىنداسى كيم يو جوڭ ( Kim Yo Jong) وڭتۇستىك كورەياعا 65 جىلدان كەيىن العاش رەت بارعان كيم اۋلەتىنىڭ وكىلى بولىپ تاريحتا قالدى. ساراپشىلار سولتۇستىك كورەيا قىسقى وليمپيادا ويىندارىن ديپلوماتيالىق داعدارىستان شىعۋدىڭ قۇرالى رەتىندە پايدالانىپ وتىر، وسى ورايدا وڭتۇستىك كورەيامەن بولعان مامىلەسىن جاقسارتۋعا تىرىسىپ وتىر دەپ قارايدى. ايتالىق، پيوڭياڭ (Pyongyang/پحەنيان) پيوڭچاڭ (Pyongchang/پحەنچان) وليمپياداسىنا جاپ-جاس كيم يو جوڭدى جىبەرۋ ارقىلى جۇرت نازارىن وزىنە اۋداردى.

كيم يو جوڭ دەگەن كىم؟ سولتۇستىك كورەيادا ونىڭ ىقپالى قانداي؟

كيم  يو جوڭنىڭ ساياسي كارەراسى 2014 جىلى بيىككە كوتەرىلدى. ول قازىر سولتۇستىك كورەيادا كيم جوڭ ۋننان كەيىن ەڭ ىقپالدى ادام سانالادى. بىلتىر ول كحدر جەتەكشى پارتياسى ەڭبەكشىلەر پارتياسىنىڭ ساياسي بيۋروسىنىڭ تۇراقتى مۇشەسىنىڭ ءبىرى بولىپ تاعايىندالدى. 2015 جىلدان بەرى ورتالىق كوميتەتتىڭ ۇگىت-ناسيحات ءبولىمىنىڭ جەتەكشىسى بولىپ كەلەدى. 31 جاستاعى كيم يو جوڭ ادام قۇقىقتارىنىڭ بۇزىلۋىنا قاتىسى بار دەگەن كۇدىكپەن اقش-تىڭ سانكتسيالار تىزىمىنە ەنگەن.

ول كيم جوڭ يردىڭ كەنجە قىزى، كيم جوۋ ۋننان ءتورت جاسقا كىشى. جوعارى وقۋ ورىنىن اعاسىنا ۇقساس شۆەيتساريادان وقىعان. 2015 جىلى كيم يو جوڭنىڭ تۇرمىسقا شىققانى ءمالىم بولعان. ونىڭ كۇيەۋى ىقپالدى ساياساتكەرلەردىڭ ءبىرى، ەڭبەكشىلەر پارتياسىنىڭ حاتشىسى چوي يوڭ ءسۇننىڭ ۇلى چوي سون. چوي يوڭ ءسۇن بولسا 2013 جىلى قىتاي باسشىسى شي جينپيڭ مەن بەيجىڭدە كەزدەستى، بىلتىر وڭتۇستىك كورەيا مەن رەسەيگە ساپارلاي بارعان.

كيم يو جوڭعا بۇل ساپاردا قانداي مىندەت جۇكتەلدى؟

شىن مانىندە كيم يو جوڭنىڭ وڭتۇستىك كورەياعا بارۋى ۇلكەن جاڭالىق بولدى. العاشقى مالىمەتتەردە سولتۇستىك كورەيا دەلەگاتسياسىنىڭ قۇرامىندا ونىڭ بولاتىنى تۋرالى ايتىلعانىمەن، اقش سانكتسياسىنا ىلىنگەن بۇل ايەل ساياساتكەردىڭ وڭتۇستىك كورەياعا كەلە قوياتىنىنا ەشكىم دە سەنگەن جوق. دەگەنمەن، قارىنداسىن وڭتۇستىك كورەياعا جىبەرگەنى كيم جوۋ ۋننىڭ تۇستىك كورەي جۇرتىمەن قارىم-قاتىناستى شىنداپ رەتتەۋگە كىرىسكەن ەكەن دەگەن بولجامعا جول اشتى. كيم جوۋ ۋن ءۇشىن قارىنداسى ونىڭ ەڭ جاقىن ءارى ساياساتتاعى سەنىمدى سەرىگى. سوندىقتان دا وڭتۇستىك كورەيا پرەزيدەنتى ءمۇن جاينگە قۇپيا تۇردە كيم جوۋ ۋننىڭ اۋىزەكى سالەمىن دە الا كەلگەن بولۋى مۇمكىن.

پيوڭچاڭ وليمپياداسىنا كحدر-نىڭ جوعارى دارەجەلى دەلەگاتسياسىمەن بىرگە 22 سپورتشىسى، 140 ونەرپازى كەلدى. دابىرالى باس قوسۋلار كەزىندە كيم جوۋ ۋننىڭ قانداي اۋىزەكى سالەمى ءمۇن جاينىڭ قۇلاعىنا جەتتى، ونى تاپ باسىپ ايتۋ قازىرگە مۇمكىن بولماي وتىر. دەگەنمەن، وڭتۇستىك-سولتۇستىك كورەيانىڭ الداعى قيمىل-ارەكەتتەرىنەن ونى دا شامالاپ بولجاۋعا بولادى.

ايتا كەتەيىك، وسىعان دەيىن سولتۇستىك كورەيامەن كەلىسسوز جۇرگىزۋدىڭ بىردەن ءبىر شارتى  – كحدر-نىڭ يادرولىق باعدارلاماسىنان باس تارتۋى دەپ تۇرعان اقش-تىڭ دا پوزيتسياسى وزگەرە باستادى. ولار «كەلىسسوز ءۇشىن كەلىسسوز» جۇرگىزۋگە دايىن ەكەنىن جەتكىزدى. ياعني، العاشقى كەزەڭدەگى كەلىسسوزدەر ءۇشىن يادرولىق قارۋدان باس تارتۋ تالابىن قويمايتىنىن دا ءبىلدىرىپ وتىر. بۇل كورەي تۇبەگىندەگى اۋقىمدى وزگەرىستەردىڭ قازىرگى سيپاتى بولىپ وتىر.

“The Qazaq Times”