فوتو: وتكرىتايا ازيا

بۇگىن وڭتۇستىك كورەيانىڭ پيوڭچاڭ قالاسىندا ءححىىى قىسقى وليمپيادا ويىندارى باستالادى. وندا الەمنىڭ 92 ەلىنەن كەلگەن 2500 جۋىق سپورتشى 102 مەدالدى ساراپقا سالادى. وسىعان بايلانىستى بۇگىن ءبىز الەمدىك سپورت باسىلىمدارىنىڭ قازاقستان جانە ورتالىق ازيا سپورتشىلارىنا جاساعان بولجامدارىنا قىسقاشا توقتالۋدى ءجون كوردىك.

وزبەكستاندىق مانەرلەپ سىرعاناۋشى ميشا گە.

جالپى بيىلعى قىسقى وليمپيادا ويىندارىنا ورتالىق ازيادان 61 سپورتشى قاتىسادى. ونىڭ 57-ءسى قازاقستاننان دا، قالعان 4-ءۋى وزبەكستان جانە قىرعىزستاننان. اقپان ايىنىڭ 9-ى مەن 25-ءى ارالىعىندا وڭتۇستىك كورەيانىڭ پيوڭچاڭ قالاسىندا وتەتىن وليمپيادا ويىندارىندا وزبەكستان نامىسىن مانەرلەپ سىرعاناۋشى ميشا گە مەن شاڭعىشى كامىلجون تۋحتاەۆ قورعايدى.

قىرعىزستاندىق شاڭعىشى تاريەل جارقىمباەۆ.

ال قىرعىزستاننىڭ اتىنان بيىلعى وليمپياداعا تاۋ شىڭعىسىنان ەۆگەني تيموفەەۆ پەن كلاسسيكالىق سپرينتتەن تاريەل جارقىمباەۆ قاتىسادى. بىراق شەتەلدىك سپورت ساراپشىلارىنىڭ سوزىنشە، وزبەكستان مەن قىرعىزستان سپورتشىلارىنا بۇل جولعى وليمپيادادان مەدال العاندى بىلاي قويعاندا، ءتورت جىلدا ءبىر كەلەتىن سپورت دوداسىنا قىتىسۋدىڭ ءوزى ۇلكەن جەتىستىك.

امەريكالىق «Sports Illustrated» سپورت جۋرنالىنىڭ بولجامى بويىنشا، ورتالىق ازيا ەلدەرى اراسىندا بيىلعى وليمپيادا ويىندارىندا جوعارى ورىنداردان كورىنۋگە قازاقستاننىڭ عانا مۇمكىندىگى بار. ونىڭ وزىندە وليمپياداعا اتتانعان 46 سپورتشىنىڭ ىشىندە فريستايل-موگۋلدان دميتري رەيحەرد كۇمىس، شاڭعى سپورتىندا الەكسەي پولتورانين قولا جۇلدە الۋى مۇمكىن. ال «The Associated Press» باسىلىمىنىڭ بولجامى بويىنشا، قازاقستان بيىلعى وليمپيادادان تەك ءبىر عانا قولا الا الادى. ونى فريستايلشى دميتري رەيحەرد الۋى مۇمكىن.

قازاقستاندىق سپورتشى دميتري رەيحەرد.

وليمپيادا ويىندارىنىڭ العاشقى ويىن كۇنىندە فريستايلدان دميتري رەيحەرد، يۋليا گالىشەۆا جانە پاۆەل كولماكوۆتىڭ فينالعا شىققانىن ەسكەرسەك، الەمدىك باسىلىمداردىڭ دميتري رەيحەردقا قاتىستى ايتقان بولجامدارىنىڭ شىندىققا جاقىن ەكەندىگىنە كوز جەتكىزۋگە بولادى.

“The Qazaq Times”