ەۋروپالىق پارلامەنت "مىسىردى زورلىق-زومبىلىق پەن كەز كەلگەن كۇش كورسەتۋ ارەكەتتەرىن توقتاتۋعا شاقىرىپ، ەل ۇكىمەتىنە ادام قۇقىعىن قورعاۋ مەن قوعامنىڭ گۇلدەنۋى قاتار جۇرەتىنىن ەسكەرتتى" - دەپ حابارلايدى Al Jazeera اقپارات اگەنتتىگى.

كورنەلل ۋنيۆەرسيتەتىنىڭ ورتالىعى مالىمەتىنشە، 2013 جىلى بيلىك باسىنا ابدەل فاتتاح ەل-سيسي (Abdel Fattah el-Sisi) كەلگەننەن بەرى ەلدە قولدانىلعان ءولىم جازاسىنىڭ سانى كۇرت ارتقان. مىسالى 2014 جىلدان بەرى كەمىندە 97 ادام ءولىم جازاسىنا كەسىلگەن (2010-2014 جىلدارى 5 ادام).

بۇۇ ادام قۇقىقتارى جونىندەگى كەڭەس ماماندارىنىڭ ايتۋىنشا، مىسىردىڭ قۇزىرلى ورگاندارى كوپ جاعدايدا تۇرمەدەگىلەردى قيناپ، كۇش كورسەتىپ بارىپ قول جەتكىزگەن دالەلدەردى ولاردى ءولىم جازاسىنا كەسۋ ءۇشىن قولدانادى.

تاراعان مالىمەتكە قاراعاندا،  2 قاڭتار كۇنى جەرگىلىكتى بيلىك ورگاندارىنىڭ شەشىمىمەن ءولىم جازاسىنا كەسىلگەن 5 ادام الەكساندريادا دارعا اسىلدى. ولاردىڭ تورتەۋى 2015 جىلدىڭ ساۋىرىندە بولعان جارىلىسقا قاتىسى بار دەگەن ايىپپەن سوتتالعان بولاتىن.

2013 جىلى سيناي تۇبەگىندەگى ساربازداردىڭ ولىمىنە الىپ كەلگەن تەرروريستىك ءىس-ارەكەتتەرى ءۇشىن سوتتالعان 15 ادام 2017 جىلدىڭ 26 جەلتوقسانىندا الەكساندريادا ءولىم جازاسىنا كەسىلدى.

“The Qazaq Times”