فوتو: Al Jazeera

تۇركيانىڭ سىرتقى ىستەر ءمينيسترى - مەۆلۋت چاۆىشوۋلى (Mevlut Cavusoglu) Al Jazeera - عا: "افرين قالاسىندا YPG تەرروريستەرى تۇركياعا زىمىران لاقتىرىپ، وت جاۋدىرعان. بۇل ارەكەت ەلىمىزدىڭ قاۋىپسىزدىگى مەن شەكاراسىنا تونگەن قاۋىپ" دەگەن بولاتىن.

باتىس پەن شىعىستى جالعاپ تۇرعان تۇركيا سۇرياداعى سوعىستى قوسا العاندا، ايماقتاعى كيكىلجىڭدەر مەن داعدارىستاردا ايتارلىقتاي ماڭىزدى ستراتەگيالىق ءرول ويناپ وتىر.

20 قاڭتاردا تۇركيا ءسۇريانىڭ سولتۇستىك-باتىسىنداعى افرين قالاسىنا ء"زايتۇن بۇتاعى" وپەراتسياسىن اشقان بولاتىن. بۇل قالا سيريالىق كۇردتەردىڭ قورعانىس وداعى باقىلاۋىندا، ال تۇركيا اتالعان وداقتى تەرروريستىك ۇيىم سانايدى.

ءمينيستردىڭ ايتۋىنشا، افريندەگى كۇردتەرگە جانە ولاردىڭ وداقتاستارىنا بىرنەشە رەت ەسكەرتۋ جاسالعانىنا قاراماستان، ولار شابۋىلدارىن كۇشەيتە تۇسكەن. سونىمەن قاتار، كۇردتەردى قارۋ-جاراقپەن قامتاماسىز ەتىپ وتىرعان اقش-تان قارۋ ساتۋدى توقتاتۋدى وتىنگەنمەن، مەملەكەت مۇنى ورىنداماعان كورىنەدى. الايدا جاقىندا تۇركيا مەن اقش پرەزيدەنتتەرى تەلەفونمەن سويلەسكەندە ترامپ بۇل ۇيىمعا قارۋ ساتۋدى توقتاتقانىن ايتقان.

اقش ءالى دە كۇردتەردىڭ قورعانىس وداعىن (YPG) يگيل-گە قارسى سوعىستا وداقتاستارى سانايتىنىن ءبىلدىردى. وسىعان بايلانىستى تۇركيا ءسىم: "بۇل قوسارلى ستاندارت دەپ اتالادى. ءبىزدىڭ تەرروريزمگە قارسى سوعىسىمىزدا قوسارلى ستاندارتتى بارلىق جەردەن بايقاۋعا بولادى... اقش الەمدەگى بارلىق تەرروريستىك ۇيىمدارعا قارسى كۇرەسەدى دە، سۇرياداعى ۇيىممەن وداقتاس بولادى" دەگەن بولاتىن.

ەستەرىڭىزگە سالا كەتەيىك، اقش پەن تۇركيا قارىم-قاتىناسى سوڭعى جىلدارى، اسىرەسە، 2016 جىل شىلدەسىندە تۇركياداعى مەملەكەتتىك كوتەرىلىستەن كەيىن ناشارلاي باستادى. 2017 جىلى اقش اۋماعىنا تۇرىكتەرگە كىرۋ شارتتارى كۇردەلەندى، تۇركيا دا جاۋاپ رەتىندە امەريكالىقتار ءۇشىن ءدال وسىنداي شارالار قابىلدادى.

“The Qazaq Times”