تۇركيا پرەزيدەنتى رەجەپ تايىپ ەردوعان جانە يران باسشىسى حاسان رۋحاني. فوتو: PressTV

تۇركيا ءسۇريا اۋماعىنداعى اسكەري وپەراتسياسىن توقتاتۋى ءتيىس – دەپ مالىمدەدى يران پرەزيدەنتى حاسان رۋحاني.

تەھەراندا وتكەن ءباسپاسوز ءماسليحاتىندا حاسان رۋحاني ءسۇريانىڭ افرين اۋماعىنداعى سوعىس جونىندە ءسوز سويلەگەن. وندا ول: «افريندەگى اسكەري وپەراتسيا توقتاتىلۋى ءتيىس. سەبەبى تۇركيا تاراپىنان دا، وعان قارسى تاراپتان دا ادام شىعىنى وتە كوپ. بۇل سوعىس ەشقانداي ناتيجە بەرمەيدى. بۇل ءبىزدىڭ پوزيتسيامىز جانە ءبىزدىڭ كەڭەسىمىز. ءبىز اقش-تى قالاي سىناساق، ولاردى دا سولاي سىنايمىز. بۇنىڭ بارلىعى ءسۇريانى قۇلاتۋ ماقساتىندا جاسالىپ جاتقان جۇمىستار. قانداي دا ءبىر ەلدىڭ اۋماعىنا اسكەر كىرگىزۋ ءۇشىن سول ەلدىڭ حالقى مەن بيلىگىنەن رۇقسات سۇراۋ كەرەك» - دەگەن.

ەستەرىڭىزگە سالايىق، 20 قاڭتار كۇنى تۇركيا ءسۇريانىڭ افرين اۋماعىنا اسكەرىن كىرگىزگەن بولاتىن. رەسمي انكارانىڭ بۇنداي قادامدارعا بارۋىنا اقش-تىڭ «ءبىز ءسۇريا اۋماعىندا شەكارا قاۋىپسىزدىگىن قامتاماسىز ەتەتىن ارنايى جاساق قۇرامىز» - دەگەن مالىمدەمەسى سەبەپ بولعان.

“The Qazaq Times”