فوتو: ca-news

تۇركيا پرەزيدەنتى اراعا 59 جىل سالىپ ۆاتيكانعا باردى – دەپ حابارلايدى ANSA اقپارات اگەنتتىگى.

اقپان ايىنىڭ 5-ءى كۇنى تۇركيا پرەزيدەنتى رەجەپ تايىپ ەردوعان ۆاتيكانعا رەسمي ءىس-ساپارمەن باردى. ول وندا ريم پاپاسى فرانتسيسكپەن كەزدەسىپ، ءبىر ساعاتقا جۋىق ۋاقىت سويلەسكەن. بىراق كەزدەسۋدەن كەيىن ەردوعان دا، فرانتسيسك تا ەشقانداي رەسمي مالىمدەمە جاساماعان. بىراق رەجەپ تايىپ ەردوعان ۆاتيكانعا رەسمي ءىس-ساپارى قارساڭىندا ريم پاپاسىمەن ءسۇريا مەن يراكتاعى سوعىس جونىندە جانە يەرۋساليم ماسەلەسى جونىندە سويلەسەتىنىن مالىمدەگەن.

تۇركيا تاريحىندا سوڭعى رەت ۆاتيكانعا رەسمي ءىس-ساپارمەن 1959 جىلى سول كەزدەگى مەملەكەت باسشىسى ماحمۋد جەليال بايار بارعان. سول ۋاقىتتان بەرى ۆاتيكان جەرىنە ءبىر دە ءبىر تۇرىك باسشىسى ات باسىن بۇرماعان. ال ريم پاپالارى وسى ۋاقىتقا دەيىن 1967, 1979, 2006 جانە 2014 جىلدارى انكاراعا رەسمي ءىس-ساپارمەن بارعان.

“The Qazaq Times”