اقش رەسەيدەن يادرولىق قارۋدى قىسقارتۋ ۋادەسىن ورىنداۋدى تالاپ ەتتى

اقش مەملەكەتتىك دەپارتامەنتىنىڭ كەشە تۇستەن كەيىن جاساعان مالىمدەمەسىندە، 2010 جىلى رەسەيمەن جاساسقان كەلىسىم بويىنشا، يادرولىق قارۋلارىنىڭ سانىن شەكتەۋ مىندەتتەرىن تولىعىمەن ورىنداپ بولعانىن، الدا ماسكەۋ تارابىنىڭ دا ءوز ۋادەسىن ورىنداۋىن تالاپ ەتەتىندىگىن ايتتى. بۇل تۋرالى «WSJ» باسىلىمى حابارلادى.

اقش مەملەكەتتىك دەپارتامەنتىنىڭ مالىمەتىندە: «قۇراما شتات «ستراتەگيالىق قارۋلاردى قىسقارتۋى جاڭا كەلىسىمىنە» ساي ۋادەسىن ورىندادى» دەلىنگەن. بۇل كەلىسىمگە 2010 جىلى بۇرىنعى پرەزيدەنت وباما قول قويىپ، 2011 جىلى اقش سەناتى بەكىتكەن ەدى.

اتالعان دەپارتامەنت وكىلى حيزەر ناۋەرت سوزىندە: «رەسەي فەدەراتسياسى يادرولىق قارۋدى شەكتەۋدى قامتىعان جاڭا شارتتى ورىنداۋعا بىرنەشە رەت ۋادە بەردى.  قۇراما شتاتتار وسى ۋادەنى راستاي وتىرىپ، الداعى كەلىسىمگە سايكەس رەسەيمەن اقپارات الماسۋدا»، – دەدى.

كەلىسىم شارتتىڭ نەگىزىندە، اقش پەن رەسەي ەكى ەلدەگى يادرولىق وق تۇمسىقتاردىڭ سانىن 1550 دانادان اسىرمايدى; سونداي-اق، ەكى ەل ماڭىزدى ستراتەگيالىق قارۋلار سانالاتىن بومبالاۋشى ۇشاقتارى مەن سۇڭگۋىر كەمەلەرىنىڭ سانىن شەكتەيدى.

ناۋرىز ايىندا ەكى ەل وزدەرىنىڭ ستراتەگيالىق اكتيۆتەرى تۋرالى اقپاراتتارمەن الماساتىن بولادى. ۋاشينگتون مەن ماسكەۋدىڭ لاۋازىمدى تۇلعالارى ءبىر ءبىرىنىڭ مالىمەتتەرىن تەكسەرىپ بولىپ، شەكتەۋلەردىڭ ورىندالعانى دالەلدەنگەننەن كەيىن عانا كەلىسىم جۇزەگە استى دەپ ەسەپتەيدى.

دەگەنمەن، ۋاشينگتون مەن ماسكەۋ اراسىنداعى شيەلەنىستەر، قىرعي-قاباق سالقىندىقتار، سايلاۋ ىسىنە ارالاسۋ، سونداي-اق سەنىمسىزدىكتەن الىپ قاراعاندا، 2021 جىلى اياقتالاتىن جوبانىڭ ورىندالۋ، ورىندالماۋى انىق ەمەس.

“The Qazaq Times”