گونكونگتا ءپىل سۇيەگىن ساۋدالاۋعا تىيىم سالىندى

گونكونگتا ءپىل سۇيەگىن ساۋدالاۋعا تىيىم سالىندى. ۇكىمەت جارلىعى بىرتىندەپ ورىندالىپ، 2021 جىلدان  باستاپ اتالعان ساۋدا ءتۇرى تولىقتاي توقتاتىلادى دەپ كۇتىلىپ وتىر. بەرىلگەن شارا پىلدەردى قورعاۋ ماقساتىندا قولعا الىنعان. بۇل تۋرالى ءال-جازيرا اقپاراتتىق اگەنتتىگى جازدى. 

بۇكىلالەمدىك جابايى تابيعات قورىنىڭ كوشباسشىسى مارگارەت كيننايرد گونكونگ اكىمشىلىگىنىڭ شەشىمىن قۋانا قابىل العانىن ايتادى. "گونكونگ - ءپىل سۇيەگىن ساۋداعا شىعاراتىن نەگىزگى نارىقتاردىڭ ءبىرى. ونىڭ قىتايدىڭ ىزىمەن قابىلداپ وتىرعان شەشىمى پىلدەردى قورعاۋعا ۇلكەن ۇلەس قوسادى", - دەدى ول.

اتالعان شەشىم قىتايدا 2018 جىلدىڭ 1 قاڭتارىنان باستاپ كۇشىنە ەنگەن ءپىل سۇيەگىنىڭ ءۇي جاعدايىندا ساۋدالانۋىنا توسقاۋىل قوياتىن زاڭنىڭ سوڭىن الا جاريالاندى. جابايى فلورا مەن فاۋنانىڭ جويىلىپ كەتۋ قاۋپى بار وكىلدەرىنىڭ حالىقارالىق ساۋداسى تۋرالى كونۆەنتسياعا سايكەس، ءپىل سۇيەگىن ساتۋعا 1989 جىلدان باستاپ تىيىم سالىنعان.

قىتاي افريكادان كەلەتىن ءپىل سۇيەگىنىڭ ەڭ ۇلكەن نارىعى بولعان. حالىقارالىق ۇيىمداردىڭ قىسىمىمەن اتالعان زاڭ كۇشىنە ەندى. دەگەنمەن ساراپشىلار بۇل ءوندىرىستىڭ توقتاۋىن قامتاماسىز ەتە المايتىنىن ايتادى. "كاسىپكەرلەر تاۋاردى زاڭدارى قاتال ەمەس ۆەتنام نەمەسە لاوسقا بارىپ، الىپ كەلە الادى", -دەيدى ولار.

“The Qazaq Times”