فوتو: QT

2017 جىلى بىرىڭعاي جيناقتاۋشى زەينەتاقى قورىنا پروبلەمالى ەميتەنتتەردەن 1 ملرد 249 ملن تەڭگە سوماداعى قارىز قايتارىلدى. وسىلايشا قازىرگى كەزدە قوردىڭ پروبلەمالى اكتيۆتەرى 37 ملرد تەڭگەگە دەيىن تومەندەگەن. بۇل تۋرالى بۇگىن بجزق ءباسپاسوز كونفەرەنتسياسىندا ءمالىم بولدى. 

"بىزدە 19 پروبلەمالى ەميتەنت بار. ولاردىڭ قورعا جالپى بەرەشەك سوماسى 37 ملرد تەڭگەگە تەڭ.  جۇرگىزىلگەن جۇمىستاردىڭ ارقاسىندا ولاردىڭ قارىزى ازايىپ كەلەدى. ءبىز جۇمىستى توقتاتپايمىز. كوپتەگەن كومپانيالار "قۇيتۇرقىلىققا" سالىنىپ، بانكروت بولعىسى كەلەدى دە، ءبىزدىڭ سوتتاسۋىمىزعا تۋرا كەلىپ جاتادى. ءبىز قور تاراپىنان بانكروت بولۋعا ۇشىراتپاۋدىڭ شارالارىن جاساپ جاتىرمىز", - دەدى "بجزق" اق جۇرتشىلىقپەن بايلانىس دەپارتامەنتىنىڭ ديرەكتورى قادىرجان زابيح.

بۇدان بولەك، ءباسپاسوز كونفەرەنتسياسىندا قور توراعاسىنىڭ ورىنباسارى ساۋلە ەگەۋباەۆا ءبىراز سالىمشىلار زەينەتاقىلارىن ساقتاندىرۋ كومپانيالارىندا راسىمدەگەنىن ايتتى.

"2017 جىلى 26,06 ملرد تەڭگە ساقتاندىرۋ كومپانيالارىنا اۋدارىلدى. سالىمشىلار زەينەتاقى اننۋيتەتىن ساقتاندىرۋ كومپانيالارىنان راسىمدەۋدى ءجون كورگەن. ولاردىڭ سانى 2017 جىلى  2784 ادام بولدى", - دەدى ەگەۋباەۆا.

مۇنداعى زەينەتاقى اننۋيتەتى دەگەنىمىز - بجزق-داعى جيناعى جەتكىلىكتى بولعان جاعدايدا، تاعايىندالعان زەينەتاقى جاسىنا قاراماستان ءوزىنىڭ زەينەتاقىسىن الۋعا مۇمكىندىك الۋ ءۇشىن ساقتاندىرۋ كومپانياسىمەن جاسالاتىن كەلىسىم. دەگەنمەن ساقتاندىرۋ كومپانيالارىنىڭ تالابى بويىنشا ەگەر ايەل ادام 50 جاستا زەينەتكە شىققىسى كەلسە، ونىڭ 9,7 ملن تەڭگە شاماسىندا جيناعى بولۋ كەرەك. ال ەر ادام 55 جاسىندا زەينەتكە شىعۋ ءۇشىن شوتىندا 6,9 ملن تەڭگە بولۋ قاجەت. بۇل 2017 جىلدىڭ باسىنداعى ستاتيستيكا. بيىل بۇل كورسەتكىش وزگەرۋى دە عاجاپ ەمەس.

“The Qazaq Times”