قازاقستان 2018-2022 جىلدارى ءدىني ەكسترەميزم جانە تەرروريزممەن كۇرەسۋ ءۇشىن 286 ملرد 981,6 ملن تەڭگە جۇمساۋدى جوسپارلاپ وتىر. 

قازاقستاننىڭ ۇلتتىق قاۋىپسىزدىك كوميتەتى ءدىني ەكسترەميزم مەن تەرروريزمگە قارسى قازاقستاننىڭ 2018-2022 جىلعا ارنالعان مەملەكەتتىك باعدارلاماسىن دايىندادى. ءىس-شارا جوسپارى "اشىق نورماتيۆتىك قۇقىقتىق اكتىلەر" پورتالىندا جاريالانعان جانە 2018 جىلدىڭ 6 اقپانىنا دەيىن تالقىلاۋدا بولادى.

"2018-2022 جىلدارعا ارنالعان باعدارلامانى جۇزەگە اسىرۋ ءۇشىن  رەسپۋبليكالىق، جەرگىلىكتى بيۋدجەت قارجىسى جانە قازاقستان رەسپۋبليكاسىندا زاڭدى تۇردە تىيىم سالىنباعان قاراجات جۇمسالادى. باعدارلامانى جۇزەگە اسىرۋدا بيۋدجەتتەن كەتەتىن شىعىن 286 ملرد 981,6 ملن تەڭگەنى قۇرايدى (رەسپۋبليكالىق بيۋدجەت شىعىنى - 226 ملرد 294 ملن تەڭگە، جەرگىلىكتى بيۋدجەت شىعىنى - 60 ملرد 687 ملن تەڭگە). بۇدان بولەك، رەسپۋبليكالىق جانە جەرگىلىكتى بيۋدجەتتەن قارجىلاندىرۋ وسى كەزەڭدەردە ناقتىلانعان بيۋدجەت ەسەبىنە سايكەس بولادى", - دەلىنگەن قۇجاتتا.

باعدارلاما اياسىندا راديكالدى يدەولوگياعا قارسى جاعدايدى قالىپتاستىرۋ جانە سوتتالعانداردى دەراديكالداندىرۋ، ينتەرنەتكە، الەۋمەتتىك جەلىلەرگە، بۇقارالىق اقپارات قۇرالدارىنا مونيتورينگ جۇرگىزۋ، ءتۇرلى دوڭگەلەك ۇستەلدەر، سەمينارلار، زەرتتەۋلەر جۇرگىزۋ جوسپارلانعان.

سونداي-اق، قارجى ازاماتتارعا ءدىني قاتىناستار تۋرالى كەڭەس بەرەتىن "114" بىرىڭعاي رەسپۋبليكالىق جەلىسىنىڭ جۇمىس ىستەۋىن قامتاماسىز ەتۋگە جۇمسالماق.

“The Qazaq Times”