سولتۇستىك كورەيا ايەلدەر فۋتبول كومانداسى. فوتو: people.

وڭتۇستىك كورەيادا وتەتىن پيوڭچاڭ قىسقى وليمپياداسىنا سولتۇستىك كورەيا سپورتشىلارىنىڭ دا قاتىسۋى مۇمكىن. دەگەنمەن، الدىن الا جاسالعان مالىمەتتەرگە قاراعاندا سولتۇستىك كورەيادان بۇل رەتكى وليمپيادا ويىندارىندا ەكى سپورتشى جىبەرۋمەن شەكتەلمەك. وسىعان وراي اقپارات كوزدەرى سولتۇستىك كورەيا سپورتشىلارىنىڭ قاي دەڭگەيدە دەگەن سۇراق توڭىرەگىندە تالقىلاۋدا. بۇل تۋرالى «People» باسىلىمى جانە BBC تالداۋ جاسادى.

BBC-ءدىڭ كورسەتۋىنشە، سپورتتىڭ كەيبىر تۇرلەرىندە سولتۇستىك كورەيا الەمدىك ليدەر بولىپ كەلگەن. وسىدان بۇرىنعى جازعى وليمپيادا ويىندارىندا سولتۇستىك كورەيا جالپى ەسەپتە 54 مەدال الىپ، ءۇندىستان مەن نيگەريا سەكىلدى حالىق سانى مول ەلدەردەن دە وزىپ كەتكەن.

سولتۇستىك كورەيا سپورتى تۋرالى، اسىرەسە وليمپيادا ويىندارىندا جەتكەن تابىستارىنا قاراپ ەلدە اۋىر اتلەتيكا ءبىرشاما جوعارى دەڭگەيدە دەۋگە بولادى. وليمپيادا تاريحىندا اتالعان ەلدىڭ سپورتشىلارى ءۇش رەت الەمدىك، ەكى ەرت وليمپيادا رەكوردىن جاڭارتقان. ريو-دە-جانەيرودا وتكەن وليمپيادا ويىنىندا سولتۇستىك كورەيا جەتى مەدال الىپ (ەكەۋى التىن), قاتىسقان ەلدەر ءتىزىمىنىڭ ورتاسىنان ورىن الدى.

FIFA-نىڭ ەسەبى بويىنشا سولتۇستىك كورەيانىڭ ايەلدەر فۋتبول كومانداسى 11 ورىندا تۇرادى. كەلەسى جىلى وتەتىن ايەلدەر اراسىنداعى فۋتبول چەمپيوناتىنا كىرە الماعانىمەن، وتكەن جىلى شىعىس ازيا بىرىنشىلىگىن جەڭىپ العان. 2016 جىلى جاستار قۇراماسى الەم كۋبوگىن ۇتىپ العان.

اتالعان ەلدىڭ ۇلتتىق فۋتبول قۇراماسى ەكى رەت الەم بىرىنشىلىگى جارىسىنا كىرگەن. قازىرگى كەزدە 126-شى ورىندا تۇرادى. سولتۇستىك كورەيا ۇلتتىق قۇراماسىنىڭ ەڭ تانىمال ويىنى 1966 جىلى ۇلىبريتانيادا وتكەن الەم چەمپيوناتى كەزىندە بولعان، سول كەزدە كحدر كومانداسى جارتىلاي فينالعا دەيىن جەتكەن. 2010 جىلعى الەم چەمپيوناتىندا توپتىق ويىندا برازيليا كومانداسىمەن ويناپ، 2:1 ەسەبىمەن ۇتىلعان. بىراق ەكىنشى كەزەكتە پورتۋگاليا كومانداسىنا جولىعىپ 7:0 ەسەبىمەن توپتان شىعا الماي قالدى.

سولتۇستىك كورەيادا تاەكۆوندو سپورتى بيىك ورەدە. الايدا، الەمدىك جارىستاردا سولتۇستىك كورەيالىق تاەكۆوندو شەبەرلەرى تەك حالىقارالىق تاەكۆوندو قاۋىمداستىعى اتىنان عانا قاتىسادى. بۇل سپورت تۇرىندە الەمدە وڭتۇستىك كورەيا كوش باستاپ كەلەدى. تاەكۆوندو سپورت تۇرىنەن سوڭعى رەت وتكەن حالىقارالىق جارىستا سولتۇستىك كورەيا 22 التىن الىپ، تاەكۆوندو تاريحىندا دا، ەل تاريحىندا دا ۇلكەن بۇرىلىس جاساعان.

سولتۇستىك كورەيادا سپورتشىلارعا ايرىقشا قامقورلىقتار جاسالعان. ەلدە تالانتتى سپورتشىلار بالا كۇنىنەن تالدانىپ الىنىپ، تاربيەلەنەدى. ەلدەگى الەۋمەتتىك جاعدايدىڭ تومەندىگىنە قاراماستان سپورتشىلار جوعارى دەڭگەيدەگى سپورت زالدارىندا جاتتىعادى. دەگەنمەن، كوپتەگەن سوتسياليستىك رەجيمدەگى ەلدەرگە ۇقساس، بۇل ەلدە دە سپورتتىق جاتتىعۋلاردى مىندەتتى اتقارۋ بەلگىلەرى بار. ايتالىق، 40 جىلدان بەرى بۇل ەل بوكس جانە تاەكۆوندو سپورت تۇرلەرىمەن جاتتىعۋدى بارلىق ازاماتتارىنا مىندەتتەگەن. ءارى، سپورتتىڭ ماقساتى مەن مىندەتىن دە سوتسياليستىك رەجيمگە باعىتتاعان.

“The Qazaq Times”