تاجىك ءمينيسترى سەمىز ميليتسيونەرلەرگە ارىقتاۋعا بۇيرىق بەردى

تءاجىكستاننىڭ ىشكى ىستەر ءمينيسترى رامازون راحيمزودا ميليتسيا قىزمەتكەرلەرىنە تەز ارادا سالماق تاستاۋدى بۇيىردى. بۇيرىقتىڭ ورىندالۋىن قاداعالاۋدى ارنايى كوميسسياعا تاپسىردى دەپ حابارلايدى «ورتالىق ازيا حابار قىزمەتى».

"ميليتسيونەر تولا باستاعاندا، ونىڭ جۇمىس ىستەۋگە قابىلەتى ازايا تۇسەدى. ءبىزدىڭ بارلىق قىزمەتكەرلەرىمىز جاسى، بويى جانە سالماقتى سايكەستەندىرەتىن حالىقارالىق كەستەگە ساي بولۋى قاجەت. كەيبىر قىزمەتكەرلەردىڭ سالماعى بۇل قالىپقا سايكەس كەلمەيدى. ولارعا ارىقتاۋعا تۋرا كەلەدى",- دەدى مينيستر.

2016 جىلدىڭ جەلتوقسان ايىندا تاجىكستاننىڭ ءىىم قىزمەتكەرلەرى ارنايى نۇسقاۋ العان. وعان سايكەس، بويلارى 168-170 سانتيمەتر بولاتىن ميليتسيا قىزمەتكەرىنىڭ سالماعى 75 كەلىدەن اسپاۋى كەرەك. ەگەر سالماقتارى سايكەس كەلمەگەن جاعدايدا، قىزمەتتەرىنەن كەتەدى دەگەن ەسكەرتۋ العان.

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، تاجىكستاننىڭ جالپى تۇرعىندارى كەدەي بولعانىمەن، جاستارى 20-دان اساتىن ەر ازاماتتاردىڭ 31,2 پايىزى جانە ايەلدەردىڭ 30,5 پايىزىندا ارتىق سالماق بار. ساراپشىلار مۇنى جەرگىلىكتى تاعامنىڭ ەرەكشەلىگىمەن بايلانىستىرادى. تۇرعىندار ۇن، قانت جانە جانۋار مايىن كوپ قولدانادى.

“The Qazaq Times”