رەسەي بازاسىنا شابۋىل جاسالدى. فوتو:israeldefense.co.il.

سۇرياداعى رەسەيدىڭ اسكەري بازاسىنا تاعى دا شابۋىل جاسالدى. لاتاكيا پروۆينتسياسىنداعى حمەيميم اسكەري بازاسىنا درون ارقىلى شابۋىل جاساعانداردىڭ كىم ەكەنى انىق ەمەس. ال، رەسەي جاق ايىپتى «يسلام مەملەكەتى» دەپ اتالاتىن تەررورلىق ۇيىمعا ارتىپ وتىر. بۇل تۋرالى BBC-ءدىڭ رەسمي سايتى حابارلادى.

حابارعا قاراعاندا شابۋىل 6 قاڭتار كەشتە بولعان. بۇل تۋرالى العاش رەت حابار تاراتقان «Orient News» باسىلىمىنىڭ ايتۋىنشا، بازاعا جاقىنداعان دروندى قورعانىس جۇيەسى بايقاپ قالعان، كەيىن درونعا قاراتىلىپ وق اتىلعان. دەسە دە ونىڭ قانداي ناتيجە بەرگەنى انىق ايتىلماپتى.

بازانىڭ ماڭىنان تابىلعان قولدان جاسالعان درون. فوتو: ۆوەننىي وبوزرەۆاتەل.

ال، «اراب21» باسىلىمىنىڭ حابارىندا، ۇشقىشسىز ۇشۋ اپپاراتىنا قارسى وق اتىلۋدان بۇرىن بازادا جارىلىس بولعان جانە قاۋىپسىزدىك جۇيەسى سيرەنا جاساعان. اتالعان باسىلىم اقپارات كوزى رەتىندە سۇرياداعى وپپوزيتسيالىق كۇشتەردى كورسەتكەن. سۇريالىق جۋرناليست كەۆروك الماسسيان الەۋمەتتىك جەلى پاراقشاسىندا بازاداعى رەسەيلىك جاۋىنگەرلەردىڭ جارالى بولعانىن جازىپتى.

سۇرياداعى ادام قۇقىقتارىن قورعاۋ ۇيىمى مالىمەت تاراتىپ، شابۋىلدىڭ «يسلام مەملەكەتى» كۇشتەرىنىڭ لاتاكياداعى بازاسىنان جاسالعانىن ايتقان. رەسەي سايتتارىنىڭ حابارىنا قاراعاندا، بازانىڭ ماڭىنان جاسالۋى وتە قاراپايىم دروندى تابىلعان. دەگەنمەن، شابۋىل تۋرالى رەسەي قورعانىس مينيسترلىگى ەشقانداي مالىمەت تاراتپادى. بۇل سۇرياداعى رەسەيدىڭ اۋە بازاسىنا جاسالعان ءبىر اپتا ىشىندەگى ەكىنشى رەتكى شابۋىل.

“The Qazaq Times”