يراك پرەمەر-ءمينيسترى شابۋىلدان امان قالدى. فوتو: رەيتەر

يراك پرەمەر-ءمينيسترى مۇستافا ءال-كازيميگە شابۋىل جاسالدى. ەلدەگى رەسمي اقپارات قۇرالدارى ۇكىمەت باسشىسىنىڭ شابۋىلدان امان قالعانىن مالىمدەدى.

ۇشقىشسىز ۇشۋ قۇرىلعىسىمەن جاسالعان شابۋىل پرەمەر-ءمينيستردىڭ باعداتتاعى ديپلوماتيالىق «جاسىل ايماققا» ورنالاسقان رەزيدەنتسياسىنا باعىتتالعان. يراك اقپارات قۇرالدارىنىڭ حابارىنان كەيىن پرەمەر-مينيستر كازيمي ءوزىنىڭ «تۆيتتەر» پاراقشاسى ارقىلى مالىمدەمە جاسادى.

«مەن امان-ەسەنمىن، وتباسىممەن بىرگەمىن. بارشانى تىنىشتىقتى قورعاپ، سابىر ساقتاۋعا شاقىرامىن»، – دەگەن كازيمي الەۋمەتتىك جەلىدەگى مالىمدەمەسىندە.

يراكتاعى شيت كۇشتەرى مەن ساياسي توپتارى 10 قازاندا وتكەن سايلاۋ ناتيجەسىنە نارازىلىق ءبىلدىرىپ، باعداتتاعى «جاسىل ايماق» ماڭىندا ەرەۋىلدەرىن ءالى جالعاستىرىپ جاتىر. ولاردىڭ قاتارىندا يران قولداۋ كورسەتەدى دەپ تابىلعان «فاتح» كولايتسياسى مەن حاشتي-شابدي جاساقتارى دا بار.

وتكەن جۇمادا (5 قاراشا) نارازى توپ پەن قاۋىپسىزدىك كۇشتەرى اراسىندا جانجال بولىپ، قاۋىپسىزدىك كۇشتەرى تارابىنان اتىلعان وقتان ءبىر دەمونسترانت قازا تاپقان ەدى. بۇدان كەيىن نارازىلىق ءتىپتى اسقىنىپ، شيت توپتارى جاعىنان پرەمەر-مينيستر مۇستافا ءال-كازيميگە باعىتتالعان ايىپتاۋلار جيىلەگەن.

قازىر يراكتا شيت توپتارىنىڭ ۇكىمەتكە قارسى نارازىلىعى ەلدى ۇلكەن ساياسي داعدارىسقا الىپ بارا جاتقانى بايقالادى.

The Qazaq Times