قىتايدىڭ شىعىس تەڭىزىندە مۇناي جانە جۇك كەمەلەرى سوقتىعىستى

يران جانە قىتاي ۇكىمەتتەرىنىڭ رەسمي مالىمدەمەلەرىنە قاراعاندا، سەنبى كۇنى كەشتە قىتايدىڭ شىعىس تەڭىزىندە (Donghai) يرانعا تيەسىلى مۇناي تاسىمالداۋشى كەمەسى مەن قىتايدىڭ جۇك تاسىمال كەمەسى سوقتىعىسقان. ناتيجەسىندە ەكى كەمەدە بىردەي ءورت شىعىپ، كوپ مولشەردە مۇناي تەڭىزگە توگىلگەن. بۇل تۋرالى «WSJ» باسىلىمى حابارلادى.

حابارعا قاراعاندا، قارا تۇتىنگە كومىلگەن «سانچى» (Sanchi) دەپ اتالاتىن تانكەردە  شامامەن ميلليون باررەل مۇناي بولعان. «سانچى»-نىڭ مۇناي تاسىمالداۋ سىيىمدىلىعى 1989 جىلى اۋىر تەڭىز لاستانۋىن تۋدىرعان Exxon Valdez تانكەرىنىڭ مۇناي سىيىمدىلىعىنا تاياۋ. رەسميلەردى تەڭىزگە توگىلگەن مۇناي الاڭداتىپ وتىر.

قىتاي ۇكىمەتى جاعىنان قۇتقارۋ، بارلاۋ جانە تازالاۋشى كەمەلەر جىبەرىلگەن. بۇعان وڭتۇستىك كورەيا تارابى دا قولداۋ كورسەتىپ، ءبىر كەمە جانە ءبىر ۇشاق جىبەرگەن. قىتاي جانە يران وكىلدەرىنىڭ مالىمەتىنشە،  «سانچى» اتتى كەمەنىڭ ۇزىنعى 274 مەتر بولىپ، وندا 30 يراندىق جانە 2 بانگلادەش ازاماتى  بولعان. قازىر ولاردىڭ جاعدايى تۋرالى انىق مالىمەت جوق. وقيعا تۋىلۋدان بۇرىن مۇناي كەمەسى يراننان وڭتۇستىك كورەيانىڭ ديسان ارالىنا قاراي ءجۇزىپ بارا جاتقان.

Changfeng Crystal كەمەسىندەگى قىتايلىق  21 ەكيپاج مۇشەسى قۇتقارىلعان. كەمەنىڭ كورپۋسى اۋىر زاقىمدالعان. بۇل كەمە اقش-تان قىتايدىڭ گۋاڭدوڭ (گۋاندۋن) پروۆينتسياسىنا 64 مىڭ توننا ازىق تۇلىك الىپ كەلە جاتقان.

اپاتتى جاعدايعا نە سەبەپ بولعانى ءالى انىق ەمەس.

“The Qazaq Times”