ورتا-شىعىستا قاقتىعىس قاۋپى ارتۋدا: ورمۋز بۇعازىندا قاۋىپتى جاعداي قايتالاندى

بريتانياعا تيەسىلى مۇناي تاسىمال كەمەسى ورمۋز بۇعازىندا يران اسكەري كەمەسىنىڭ توسقاۋىلىنا ۇشىراعان. بۇل تۋرالى بريتانيا رەسمي مالىمدەمە تاراتتى.

بريتانيانىڭ مالىمدەۋىنشە، يران تەڭىز كۇشتەرىنە تيەسىلى 3 كاتەر بريتانياعا تيەسىلى مۇناي كەمەسىن توسۋعا ارەكەت ەتكەن. الايدا، مۇناي كەمەلەرىن قورعاپ جۇرگەن HMS Montrose اسكەري كەمەسى جەتىپ كەلىپ، يراندىق كاتەرلەر كەيىن شەگىنگەن.

بۇدان ءبىر اپتا بۇرىن گيبرالتار جاعالاۋىندا يران مۇناي تانكەرىن بريتانيا تەڭىز كۇشتەرى ۇستاعان بولاتىن. وعان سۇرياعا سالىنعان حالىقارالىق سانكتسيانى بۇزباق بولدى دەگەن ايىپ تاعىلعان ەدى.

دەگەنمەن، يراننىڭ رەسمي اقپارات اگەنتتىگى ورمۋز بۇعازىنداعى وقيعاعا يسلام رەۆوليۋتسياسى ساقشىلار كورپۋسىنىڭ ەش قاتىسى جوق دەگەندى ايتقان. ال، يران ءسىم تارابى: «بۇنىڭ ءبارى قايشىلىقتى ءورشىتۋ ءۇشىن جاسالعان. سوندىقتان، بۇل مالىمدەمە نەگىزسىز»، – دەگەن.

قازىر اقش-يران قايشىلىعى ءورشىپ، ورتا-شىعىس، اسىرەسە پارسى شىعاناعىنداعى قاۋىپسىزدىك ماسەلەسىنە قاتەر ارتىپ كەلەدى. يراننىڭ ساياساتىنا نارازى اقش قىسىمى ازاياتىن ەمەس، كەرىسىنشە، سانكتسيا سالماعىن ارتتىرىپ وتىر. يرانعا باعىتتالعان قىسىمعا سوڭعى كەزدەرى بريتانيانىڭ دا قوسىلعانى بايقالادى. ال، كەلىسىمگە قول قويعان وزگە ەكى ەۋروپالىق ەلدەر (فرانتسيا مەن گەرمانيا) ۇنسىزدىك تانىتىپ وتىر. جاعداي جالعاسا بەرسە، ورمۋز بۇعازىنا جاقىن ماڭدا قالايدا كەمەلەر اراسىندا قاقتىعىستىڭ بولۋى ابدەن مۇمكىن.

“The Qazaq Times”