وڭتۇستىك كورەيانىڭ بىرلەستىك ءمينيسترى  سولتۇستىك كورەيا ۇكىمەتى 9 قاڭتار كۇنى فانمىنجوڭدا وتەتىن كەزدەسۋ ۇسىنىسىن قابىلداعانىن مالىمدەدى. رەسمي اقپارات كوزدەرىنىڭ تاراتقان حابارىنا قاراعاندا قاراعاندا، كەزدەسۋ كەزىندە سولتۇستىك پەن وڭتۇستىكتىڭ قارىم-قاتىناسىن جاقسارتۋدىڭ پراكتيكالىق ماسەلەلەرى تالقىلانباق. ول ءۇشىن ەكى جاق وڭتۇستىك كورەيادا وتەتىن قىسقى وليمپيادا ويىندارى تۋرالى ماسەلەلەردى تالقىلاۋدى قولعا الماق. بۇل تۋرالى «شينلاڭ» اقپاراتتىق سايتى حابارلادى.

الدا بولاتىن كەزدەسۋ وتىرىسى سول ەكى ەلگە عانا ەمەس، ءوڭىردىڭ قاۋىپسىزدىگى مەن الەمنىڭ تىنىشتىعى ءۇشىن دە اسا ماڭىزدى. ول جانە وڭتۇستىك كورەيانىڭ پرەزيدەنت تاعىنا ءمۇن جاين كەلگەننەن بەرگى العاش رەت ەكى كورەي ۇكىمەتىنىڭ كەزدەسۋ وتىرىسى. ەكى جاقتىڭ رەسمي تۇلعالارى 2015 جىلدىڭ جەلتوقسان ايىنان بەرى رەسمي كەزدەسۋ وتكىزىپ كورمەگەن.

جاڭا جىل قارساڭىندا سولتۇستىك، وڭتۇستىك كورەيا اراسىنداعى قاتىناستا ۇلكەن وزگەرىس بولىپ، سولتۇستىك كورەيانىڭ قاباعى جادىراي ءتۇستى. بۇل وڭتۇستىك كورەيانىڭ الدا بولاتىن قىسقى وليمپيادا ويىندارىنا سولتۇستىك كورەيانى ۇسىنىس ەتۋىمەن باستالعان وڭدى ءۇردىس بولدى. 3 قاڭتار كۇنى سولتۇستىك كورەيا جاق ەكى ەل ورتاسىنداعى تىكەلەي جالعاناتىن قوڭىراۋلار جەلىسىن قايتا قوسىپ، ەكى ەل اراسىنداعى ديپلوماتيالىق ىستەردە وڭدى قادامدى باستى.

ال، 9 قاڭتارعا جوسپارلانعان كەزدەسۋ، كورەي تۇبەگىنىڭ الداعى بولاشاعى ءۇشىن دە، ەكى ەلدىڭ اراسىنداعى ديپلوماتيالىق قاتىناستاردىڭ دامۋى ءۇشىن دە اسا ماڭىزدى. سەۋلدىڭ مالىمەتتەرىنىڭ بىرىندە: «سولتۇستىك جاق ازىرگە يادرولىق باعدارلامالار تۋرالى سويلەسۋ جونىندە نيەت تانىتپادى. سولاي بولا تۇرسا دا بۇل كحدر-مەن كەلىسسوز جۇرگىزۋدەگى ۇلكەن جەتىستىك»، – دەلىنگەن.

“The Qazaq Times”