جەتى جاستاعى الەپپولىق قىز ترامپقا حات جازدى

Cۇريالىق جەتى جاستاعى ءبۇلدىرشىن بانا الابەد اقش-تىڭ جاڭا سايلانعان پرەزيدەنتى دونالد ترامپقا اشىق حات جازدى دەپ حابارلايدى BBC-ءدىڭ قىرعىز قىزمەتى.

بانا بۇعان دەيىن قورشاۋدا تۇرعان الەپپودان “Twitter” ارقىلى كورگەن-بىلگەندەرىن جازىپ، كوپشىلىككە تانىمال بولىپ قالعان.

ول ترامپقا جازعان حاتىندا: ء"سىز سۇريالىق بالالار ءۇشىن بىردەمە ىستەۋىڭىز كەرەك. ويتكەنى ولار دا ءسىزدىڭ بالالارىڭىز سياقتى بەيبىت ءومىر سۇرۋگە  لايىقتى" دەپ جازعان.

بانا قازىر تۇركيادا تۇرىپ جاتىر. ول ءوز وتباسىمەن الەپپونىڭ شىعىسىنان بەيبىت تۇرعىنداردى ەۆاكۋاتسيالاۋ كەزىندە كەتكەن.

ول، وتكەن جىلدىڭ قىركۇيەك ايىندا باشار اسادتىڭ ارمياسى رەسەيدىڭ قولداۋىمەن قالانىڭ شىعىس بولىگىنە شابۋىل جاساعان كەزدەن “Twitter”-گە جازا باستاعان. بولىپ جاتقان ۋاقيعالاردى اعىلشىن تىلىندە جازىپ تۇرعان. “Twitter”-دەگى اككاۋنتىنا كومەكتەسىپ جۇرگەن اپايى فاتيما، بانانىڭ دونالد ترامپقا جازعان حاتىن BBC-گە جىبەرگەن.

فاتيمانىڭ ايتۋىنشا، بانا حاتتى اقش پرەزيدەنتىنىڭ يناۋگراتسياسىنان بىرنەشە كۇن بۇرىن جازعان. اپايى بانانىڭ اقش پرەزيدەنتىن تەلەديداردان كوپ كورگەننەن كەيىن وسىنداي شەشىمگە كەلگەنىن ايتتى.

بانانىڭ پرەزيدەنت دونالد ترامپقا جازعان حاتى

قۇرمەتتى دونالد ترامپ!

مەنىڭ اتىم بانا الابەد. مەن الەپپو قالاسىنان بولامىن. جاسىم جەتىدە. مەن وتكەن جىلدىڭ جەلتوقسان ايىندا قورشاۋدا تۇرعان الەپپودان كەتكەنگە دەيىن،ءسۇريادا ءومىر سۇرگەم. مەن سۇرياداعى سوعىستان ءجابىر كورگەن بالالاردىڭ ءبىرىمىن. ءازىر تۇركيادا بەيبىت ءومىر ءسۇرىپ جاتىرمىن. الەپپودا مەكتەپكە باراتىنمىن. مەكتەپتى بومبالاپ تاستادى. مەنىڭ دوستارىم كوز جۇمىدى. ەگەر ولار مەنىمەن بىرگە بولسا، وينايتىن ەدىك. مەن الەپپودا ويناي العان جوقپىن، ويتكەنى ول اجالدىڭ قالاسى بولدى. قازىر تۇركيادا كوشەگە شىعا الامىن. مەكتەپكە بارۋىما دا بولاتىنى انىق.

بەيبىتشىلىك ءبارىمىز ءۇشىن ماڭىزدى، ءسىز ءۇشىن دە. بىراق، ميلليونداعان سۇريالىق بالالار قازىر مەن سەكىلدى ءومىر سۇرە المايدى. ءسۇريانىڭ ءار تۇكپىرىندە ازاپ شەگىپ جاتىر. ءسىزدىڭ امەريكا پرەزيدەنتى بولعانىڭىزدى بىلەمىن. سۇريالىق بالالارمەن ەلىن قۇتقارىپ قالىڭىزشى.  سىز سۇريالىق بالالار ءۇشىن وسىنى ىستەۋىڭىز كەرەك. ويتكەنى ولار دا ءسىزدىڭ بالالارىڭىز سياقتى بەيبىت ءومىر سۇرۋگە  لايىقتى. ەگەر، ءسىز سۇرياداعى بالالار ءۇشىن وسىنى ىستەيمىن دەپ ۋادە بەرسەڭىز، مەن ءسىزدىڭ جاڭا دوسىڭىز بولامىن. سۇرياداعى بالالارعا ءسوزسىز كوڭىل بولەدى دەپ ۇمىتتەنەمىن.

بانا وسىعان دەيىن قورشاۋدا قالعان الەپپودان “Twitter”-گە كورگەن بىلگەندەرىن جازىپ كوپشىلىككە تانىمال بولعان. فوتو: TWITTER/ALABEDBANA, caption

بانا مەن وتباسى قازىر تۇراقتاپ تۇرعان تۇركيا سۇريالىق وپپوزيتسيانى قولدايدى. ال، پرەزيدەنت ترامپتىڭ ءسۇريا سوعىسى بويىنشا پوزيتسياسى ازىرگە بەلگىسىز.

"The Qazaq Times"