فوتو: kapital.kz

قازاقستاندا اۆتوكولىكتەردى مەملەكەتتىك تىركەۋ ەرەجەلەرى تۇبەگەيلى وزگەردى. بۇل تۋرالى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ فەيسبۋكتەگى پاراقشاسىندا حابارلاندى.

اگەنتتىكتىڭ مالىمەتىنشە، ازاماتتار اۆتوكولىكتى ەسەپتەن شىعارۋ كەزىندە جاڭا ەسەپكە الاتىن اۆتوكولىككە ءوزىنىڭ بۇرىنعى مەملەكەتتىك نومىرلەرىن ورناتۋدا مەملەكەتتىك باجدى 2,8 اەك كولەمىندە، ونىڭ ىشىندە ارنايى حقكو جانە ءىىم تىركەۋ-ەمتيحان بولىمشەلەرىندە ساقتاۋدا تۇرعان نومىرلەر ءۇشىن دە تولەگەن.

وسىلايشا، ءبىر جىلدا ورتا ەسەپپەن مەملەكەتتىك تىركەۋ ءنومىرى بەلگىلەرىن ساقتاۋعا 11 مىڭعا جۋىق ازامات ءوتىنىش بەرەدى ەكەن جانە بۇل ولاردى قايتا ورناتۋ ءۇشىن 63 ملن تەڭگەدەن استام سوماعا مەملەكەتتىك باج تولەگەنمەن تەڭ بولعان.

ۆەدومستۆو تاراتقان حابارلاماعا قاراعاندا، ەندى اۆتوكولىك يەلەرى تاراپىنان قوسىمشا شىعىستار بولماۋى ماقساتىندا، سونىمەن قاتار جاڭا سالىق كودەكسىنە سايكەس، مەملەكەتتىك ءنومىردىڭ 1 داناسىن 6 734 تەڭگە ورنىنا 3 367 تەڭگەگە دايىنداۋعا ءوتىنىش بەرۋ مۇمكىندىگى ۇسىنىلادى.

"30 جۇمىس كۇنىنە دەيىن مەملەكەتتىك نومىرلەردى قايتا ورناتۋ كەزىندە مەملەكەتتىك باجداردى (اەك كولەمىنىڭ جىل سايىنعى ءوسۋىن ەسكەرگەندە 2018 جىلدان باستاپ 6 734 تەڭگە كولەمىندە) تولەۋ قاجەتتىگىن الىپ تاستاۋ ماقساتىندا، اگەنتتىك ۇسىنىمدارىنىڭ نەگىزىندە سالىق كودەكسىنە وزگەرتۋلەر مەن تولىقتىرۋلار ەنگىزىلدى. جاڭا ەرەجە وسى جىلدان باستاپ جۇزەگە اسا باستادى", - دەلىنگەن حابارلامادا.

ال بۇدان بۇرىن مەملەكەتتىك ءنومىردىڭ 1 داناسى جوعالعان نەمەسە جارامسىز بولعان كەزدە ازاماتتارعا ونىڭ دۋبليكاتى (2 داناسى) ءۇشىن مىندەتتى تۇردە مەملەكەتتىك باج تولەۋگە نەمەسە اۆتوماشينانى قايتا تىركەۋگە تۋرا كەلگەن. مىسالى، ءبىر جىلدا ورتا ەسەپپەن مەملەكەتتىك تىركەۋ ءنومىرى بەلگىلەرىنىڭ دۋبليكاتىن دايىنداۋعا 1,9 مىڭعا جۋىق ازامات 11 ملن تەنگەدەن استام سومماعا ءوتىنىش بەرەدى ەكەن.

“The Qazaq Times”