فوتو: The Times

پولشا، ۆەنگريا مەن چەحيا بيىلعى جىل بريۋسسەلمەن ۇلكەن قاقتىعىستار جىلى بولادى دەگەن بولجام جاسادى. اتالعان ءۇش مەملەكەت 2015 جىلى وداق مۇشەلەرىنىڭ بوسقىنداردى ارنايى بولىنگەن كۆوتا بويىنشا قابىلداۋىن تالاپ ەتەتىن شەشىمگە قارسى شىققانى ءۇشىن ەۋروپا سوتىنا بارادى. بۇل تۋرالى ۆۆس اقپاراتتىق اگەنتتىگى جازدى. 

پولشانىڭ پرەمەر-ءمينيسترى ماتەۋش موراۆەتسكيدىڭ ايتۋىنشا، ەۋرووداققا مۇشە مەملەكەتتەر ءوز ەلىنە كىمدى كىرگىزۋ كەرەكتىگى جونىندەگى شەشىمدى جەكە قابىلداۋى كەرەك. ول قازان ايىندا اۋستريادا وتكەن سايلاۋ ناتيجەسىندە ەۋرووداقتىڭ بوسقىندار كۆوتاسىنا قارسى تاراپتىڭ جەڭىسكە جەتكەنىن العا تارتىپ: "ەۋروپا - دەموكراتيالىق قۇرلىق. بوسقىندار ميگراتسياسىنا قارسى حالىق قانا سايلاۋدا  ءدال وسى شەشىمدى قولدايتىن بيلىك وكىلدەرىن تاڭدايدى", - دەدى. ماتەۋش موراۆەتسكي اۆستريانىڭ جاڭا كانتسلەرى سەباستيان كۋرتستىڭ جەڭىسى ەل ازاماتتارىنىڭ كۆوتا ماسەلەسىنە قارسى ەكەنىن كورسەتەتىنىن وسىلاي جەتكىزدى.

20 جەلتوقسان كۇنى ەۋروپا كوميسسياسى پولشانىڭ جەمقورلىق پەن كوممۋنيستىك جۇيەنىڭ ەلەسىنەن ارىلا الماي كەلە جاتقان زاڭ جۇيەسىن رەفورمالاۋ تۋرالى شەشىمى سوت قۇزىرەتتىلىگىن شەكتەيدى دەگەن ايىپپەن ۆارشاۆاعا قارسى ءىس باستادى. ەۋرووداقتىڭ بارلىق مۇشەلەرى ءبىراۋىزدان قولداعان جاعدايدا، ەۋرووداق پولشانى وداق كولەمىندە داۋىس بەرۋ قۇقىعىنان ايىرۋى مۇمكىن. بىراق بۋداپەشت مۇنداي جاعدايدا ءوزىنىڭ ۆەتو قۇقىعىن پايدالانىپ، پولشانى قورعايتىنىن مالىمدەدى. وسىدان بۇرىن ۆەنگريانىڭ پرەمەر-ءمينيسترى ۆيكتور وربان: "پولشاعا شابۋىل جاساعان ادام، بۇكىل ورتالىق ەۋروپاعا قارسى بولادى", - دەگەن بولاتىن.

“The Qazaq Times”