فوتو: EPA

پەرۋدىڭ قازىرگى مەملەكەتتىك باسشىسى پەدرو پابلو كۋچينسكيدىڭ شەشىمىمەن باس بوستاندىعىنان ايىرىلعان بۇرىنعى پرەزيدەنت البەرتو فۋحيموريعا كەشىرىم جاريالاندى. ول قان قىسىمىنىڭ تومەن بولىپ، جۇرەك سوعىسى جيىلىگىنىڭ بۇزىلۋىنا بايلانىستى تۇرمەدەن بىردەن اۋرۋحاناعا جەتكىزىلدى. بۇل تۋرالى ۆۆس اقپاراتتىق اگەنتتىگى جازدى. 

پەرۋدىڭ پرەزيدەنت اكىمشىلىگىنىڭ حابارلاۋىنشا، البەرتو فۋحيموري دەنساۋلىق جاعدايىنا بايلانىستى بوساتىلعان. سوڭعى جىلدارى ول مەديتسينالىق كومەك الۋ ءۇشىن بىرنەشە رەت اۋرۋحاناعا جاتقىزىلعان ەدى. ەلدى 1990-2000 جىلدارى باسقارعان البەرتو فۋحيموري جەمقورلىق پەن ادام قۇقىقتارىنا قارسى ارەكەتتەرى ءۇشىن 25 جىلعا باس بوستاندىعىنان ايىرىلعان بولاتىن.

2007 جىلى پەرۋدىڭ بۇرىنعى پرەزيدەنتىنە پارا العان جانە بيلىگىن اسىرا پايدالانعان دەگەن ايىپ تاعىلىپ، سوت 6 جىل اباقتىعا جابۋ تۋرالى ۇكىم شىعاردى. 2009 جىلى البەرتو فۋحيموري ءوزى مەملەكەت باسشىسى قىزمەتىندە بولعان جىلدارى بيلىكتىڭ رۇقساتىمەن جۇمىس ىستەگەن ء"ولىم ەسكاندروندارىنىڭ" قىلمىستارى ءۇشىن تاعى 25 جىل جازاعا كەسىلدى.

جۋىردا پەرۋدىڭ قازىرگى پرەزيدەنتى پابلو كۋچينسكيگە جەمقورلىققا قاتىسى بار دەگەن ايىپپەن يمپيچمەنت جاريالانۋ قاۋپى تونگەندە كونگرەسستەگى البەرتو ءفۋحيموريدىڭ جاقتاستارى وعان كومەكتەسىپ، قولداۋ كورسەتكەن ەدى. پەرۋ وپپوزيتسياسى پرەزيدەنتتىڭ اتالعان قولداۋدى الۋ ءۇشىن ءفۋحيموريدى بوساتۋعا ۋادە بەرگەن بولۋى مۇمكىن دەگەن بولجام ايتادى. بيلىك بۇل ايىپتاۋلاردى جوققا شىعارىپ وتىر.

“The Qazaq Times”