رەسەي: سۇرياعا گۋمانيتارلىق كومەك جەتكىزۋ توقتالۋى كەرەك

رەسەي بۇۇ قاۋىپسىزدىك كەڭەسىنىڭ سۇرياعا گۋمانيتارلىق كومەك جەتكىزۋدى جالعاستىرۋ تۋرالى ۇسىنىسىنا داۋىس بەرۋدەن قالىس قالدى. ماسكەۋدىڭ پىكىرىنشە، سۇرياعا گۋمانيتارلىق كومەك بەرۋ بىرتىندەپ قىسقارتىلۋى ءتيىس. رەسەي، قىتاي، بوليۆياعا قارسى قالعان 12 مەملەكەت قولداعان ۇسىنىس قابىلدانىپ، ءسۇريا حالقى الەم ەلدەرىنىڭ بىرلەسكەن كۇشىمەن جەتكىزىلەتىن كومەكتەن قاعىلمايتىن بولدى. بۇل تۋرالى AFP اقپاراتتىق اگەنتتىگى جازدى. 

رەسەي بۇل جولى ۇسىنىستىڭ قابىلدانۋىنا تۇبەگەيلى توسقاۋىل بولاتىن ۆەتو قۇقىعىن پايدالانعان جوق. وتكەن ايداعى  بۇۇ  قاۋىپسىزدىك كەڭەسىنىڭ ءسۇريا ۇكىمەتىنىڭ حيميالىق قارۋ قولدانعانىن انىقتاۋعا ارنالعان زەرتتەۋ جۇرگىزۋ جونىندەگى باستاماسىنا ۆەتو قويعان ەدى. جالپى العاندا، رەسەي سۇرياداعى سەرىكتەسى باشار اسادتى قولداۋ ءۇشىن بۇۇ قاۋىپسىزدىك كەڭەسىندە ءوزىنىڭ ۆەتو قۇقىعىن 11 رەت پايدالانعان.

بۇۇ ۇسىنعان رەسمي دەرەكتەرگە سايكەس، جەتىنشى جىل قاتارىنان سوعىس ءورتى شارپىعان ءسۇريادا 13 ملن حالىق گۋمانيتارلىق كومەككە مۇقتاج. رەسەي ەلشىسىنىڭ ورىنباسارى ۆلاديمير سافرونكوۆتىڭ ايتۋىنشا، گۋمانيتارلىق كومەكتى يوردانيا ۇكىمەتى مەن داماسكىگە ەسكەرتپەي ەركىن الىپ كىرە بەرۋگە مۇمكىندىك بەرەتىن قازىرگى جۇيە ءسۇريانىڭ تاۋەلسىزدىگىنە نۇقسان كەلتىرەدى.

“The Qazaq Times”