گەرمانيا وتكەن جىلعى تەرراكت قۇرباندارىنىڭ جاقىندارىنا لايىقتى قولداۋ كورسەتپەگەنىن مويىندادى

گەرمانيا ۇكىمەتى وتكەن جىلعى تەرراكت قۇرباندارىنىڭ جاقىندارىنا لايىقتى قولداۋ كورسەتىلمەگەنىن ەسكە الىپ، قوعامدىق قاتەر تۋعىزعان وقيعا كەزىندەگى بىرنەشە ولقىلىقتى مويىندادى. انگەلا مەركەل باستاعان بيلىك وكىلدەرى جەرگىلىكتى حالىقپەن كەزدەسىپ، تەرراكت قۇرباندارىنا ارنالعان ەسكەرتكىشكە گۇل شوعىرىن قويدى. بۇل تۋرالى AFP اقپاراتتىق اگەنتتىگى جازدى. 

وتكەن جىلى برەيدشتەيدپلاتتستا تۋنيستىك بوسقىن انيس امري روجدەستۆو قارساڭىندا قۇرىلعان مەرەكەلىك بازارلاردىڭ بىرىنە قاراي جۇك كولىگىن باعىتتاپ، ناتيجەسىندە 12 ادام قازا تاۋىپ، 70-كە جۋىق بەيبىت تۇرعىن جارالانعان بولاتىن. وسى تەرروريستىك وقيعادان سوڭ، انگەلا مەركەل جاقىندارىن جوعالتقان وتباسىلارمەن جەكە بايلانىسقا شىعىپ، كوڭىل ايتپاعانى، ال مەملەكەت قاۋىپسىزدىك شارالارىن دۇرىس ۇيىمداستىرماعانى ءۇشىن سىنعا الىنىپ ەدى. ماسەلەن، حالىقتىڭ ءبىر بولىگى قايعىلى وقيعاعا 2015 جىلى گەرمانياعا كەلگەن، ءارتۇرلى اتپەن تىركەلىپ جۇرگەن تەررورشىنىڭ دەر كەزىندە دەپورتاتسيالانباعانىن سەبەپ دەپ تاپسا، جۋىردا Welt am Sonntag باسىلىمى مەملەكەتتىڭ انيس ءامريدىڭ بارلىق كۇدىكتى  ارەكەتتەرىنەن حاباردار بولعانىن، ونىڭ وزگە سىبايلاستارىن انىقتاۋ ءۇشىن بوستاندىقتا قالدىرعانىن جازدى.

گەرمانيا پرەزيدەنتى فرانك-ۆالتەر شتاينمايەر: "سىزدەر وزدەرىڭىزدى مەملەكەت قايعىمەن جالعىز قالدىرىپ كەتكەندەي سەزىنگەندەرىڭىزدى بىلەمىن", - دەدى. انگەلا مەركەل تەرراكت قۇرباندارىن ەسكە الۋ جيىنىندا جاڭا مەموريالدىڭ تۇساۋىن كەستى. بىلتىرعى قاندى وقيعا قۇرباندارىنىڭ ەسىمدەرى جازىلعان ەسكەرتكىشتىڭ الدىندا تۇرىپ ول: "بۇگىن تەك مۇڭاياتىن كۇن عانا ەمەس، ءبىزدىڭ بۇرىن دۇرىس جۇمىس ىستەمەگەن دۇنيەلەردى قايتا قالپىنا كەلتىرگەن ەرىك-جىگەرىمىزدىڭ جاندانعان كۇنى", - دەدى.

“The Qazaq Times”