كورەي تۇبەگى قايشىلىعى كەلىسسوز ارقىلى شەشىلۋىنەن ءۇمىت بايقالدى

اقش مەملەكەتتىك حاتشىسى رەكس تيللەرسون ءبىر كۇن بۇرىن جاساعان مالىمدەمەسىندە، سولتۇستىك كورەيا كەلىسسوز ۇستەلىنە كەلۋگە دايىن بولعانشا، اقش جاق سولتۇستىك كورەيامەن ەشقانداي كەلىسسوز العىشارتى تۋرالى سويلەسپەيتىنىن مالىمدەدى. بۇل تۋرالى «شينحۋا» اقپاراتتىق اگەنتتىگىنىڭ رەسمي سايتى حابارلادى.

قازىرگى كورەي تۇبەگى ماسەلەسىندە تيللەرسوننىڭ بۇل پوزيتسياسى وڭ مانگە يە. سەبەبى، قازىرگى كەزدە كورەي تۇبەگى قايشىلىعى حالىقارالىق قاۋىمداستىقتىڭ باستى الاڭداۋشىلىعىن تۋعىزعان ءارى قايشىلىقتار مەن شيەلەنىستەر تەرەڭدەي تۇسۋدە. سولتۇستىك كورەيا مەن اقش اراسىنداعى قارسىلاستىق كۇشەيە تۇسسە، ونىڭ زاردابى تىم اۋىر بولماق.

اقش-تىڭ سولتۇستىك كورەياعا كەلىسسوزگە مۇمكىندىك بەرۋى، شيەلەنىستەردىڭ تەرەڭدەۋىن توقتاتىپ، بارلىق تاراپتاردىڭ «كەلىسسوز ارقىلى شەشۋ» ۇستانىمىن كۇشەيتە تۇسەدى دەپ ۇمىتتەنۋگە بولادى. ەگەر شىن مانىندە اقش پەن كحدر ماسەلەنى كەلىسسوز ارقىلى شەشۋگە بەكىسە، وندا ەكى تاراپتا وسىعان دەيىنگى قايشىلىقتاردىڭ ءبارىن قايىرىپ قويىپ، تۇبەك ماسەلەسىن باسىنان باستاپ شەشۋگە كىرىسەر ەدى.

كوپ ساندى ساراپشىلار، كورەي تۇبەگى ماسەلەسىن كەلىسسوز ارقىلى شەشۋدە اقش پەن سولتۇستىك كورەيانىڭ جەكە كەلىسسوز جۇرگىزۋى ناتيجەلى بولادى. ال، رەسەي، قىتاي، وڭتۇستىك كورەيا جانە جاپونيا قاتارلى ەلدەردىڭ ارالاسۋى ماسەلەنى ءتىپتى دە اۋىرلاتا تۇسەدى دەپ قارايدى. دەگەنمەن، قىتاي مەن وڭتۇستىك كورەيا بۇل كەلىسسوز ۇستەلىنەن شەتتەتىلۋى مۇمكىن ەمەس.

“The Qazaq Times”