Photo: karaganda-region.gov.kz

قاراعاندى وبلىسىنداعى "ارسەلورميتتال تەمىرتاۋ" شاحتالارىنداعى 150-دەن اسا كەنشى جەر بەتىنە كوتەرىلدى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى. 

تاراعان مالىمەتتەرگە سەنسەك، 13 جەلتوقسان كۇنى 00.30-دا ەرلان قوشانوۆ شاحتينسك شاحتاسىنىڭ كەنجارىنا ءتۇسىپ، ەكى ساعاتتىق كەلىسسوزدەن كەيىن جەر بەتىنە 59 ادام كوتەرىلگەن. تەنتەك شاحتاسىندا كەزدەسۋدەن سوڭ 76 ادام جەر بەتىنە شىققان.

تەنتەك شاحتاسىندا ەرلان قوشانوۆ «ارسەلورميتتال تەمىرتاۋ» اق شاحتالارى ديرەكتورلارىنىڭ، كاسىپوداقتار جانە بريگاديرلەردىڭ قاتىسۋىمەن جينالىس وتكىزدى. مۇندا تاعى ءبىر مارتە كەنشىلەردىڭ تالاپتارى مەن كومپانيانىڭ ۇسىنىستارى تالقىلاندى.

قاراعاندى وبلىسىنىڭ اكىمى ەرلان قوشانوۆ كەنشىلەرمەن سويلەسكەن. فوتو: karaganda-region.gov.kz

ودان كەيىن اكىم لەنين شاحتاسىنا كەلىپ، كەنجارعا ءتۇسىپ، كەنشىلەرمەن كەزدەسكەننەن سوڭ 19 ادام جەر بەتىنە كوتەرىلگەن.

ال 06.00 شاماسىندا اكىم قازاقستان شاحتاسىنا ءتۇسىپ، وندا دا كەنشىلەرمەن كەزدەسكەن. بىراق كەلىسسوزدەر جالعاسۋدا.

"13 جەلتوقسان تاڭەرتەڭگى ساعات 8-گە دەيىنگى ۋاقىتتا  154 كەنشى جەر بەتىنە كوتەرىلدى. مۇنىمەن قوسا، الەۋمەتتىك جەلىلەردە شاحتينسكىدە قاماۋعا الۋ جاعدايلارى ورىن العانى تۋرالى مالىمەت تاراعان. بۇل اقپاراتقا قاتىستى قاراعاندى وبلىسىنىڭ ىشكى ىستەر دەپارتامەنتىنىڭ ءباسپاسوز-قىزمەتى شاحتينسك قالاسىندا ەشقانداي تۇتقىنداۋ جانە قاماۋ امالدارى جۇرگىزىلمەگەنىن مالىمدەدى. پوليتسيا قىزمەتكەرلەرى ازاماتتارعا جالپى دۇربەلەڭگە بوي بەرمەۋلەرىن سۇرايدى", - دەلىنگەن ءباسپاسوز حابارلاماسىندا.

ايتا كەتەيىك، كەشە قر ەڭبەك جانە الەۋمەتتىك دامۋ ءمينيسترى تامارا دۇيسەنوۆا  "جالاقىمىزدى 100 پايىزعا كوتەرسىن" دەگەن تالاپپان قاراعاندى شاحتالارىنان شىقپاي وتىرعان كەنشىلەردىڭ سانى 684 ادامعا جەتكەنىن حابارلاعان بولاتىن. كەنشىلەر 11 جەلتوقساننان بەرى جالاقىنى 100 پايىزعا كوتەرۋ، اۋىرعان ۋاقىتتارعا 100 پايىز ەڭبەكاقى بەرۋ، زەينەتاقى جاسى ماسەلەلەرى بويىنشا نارازىلىق تانىتىپ جەر استىنان شىقپاي وتىر جانە كۇن وتكەن سايىن ولاردىڭ سانى كوبەيگەن.

“The Qazaq Times”