فرانتسيا مەن يزرايل باسشىلارى كەزدەسۋدە. فوتو: NDTV.com.

فرانتسيا پرەزيدەنتى ەممانۋەل ماكرون يزرايل پرەمەر-ءمينيسترىن قابىلدادى. ەكى ەلدىڭ باسىشىلارى ۇكىمەت ارالىق جوعارى دەڭگەيدەگى كەلىسسوز وتكىزدى. بۇل تۋرالى «شينلاڭ» اقپاراتتىق سايتى حابارلادى.

كەزدەسۋ كەزىندە تالقىلانعان كەيبىر ماسەلەلەردە ماكرون مەن نەتانياحۋدىڭ پىكىرلەرى قايشى كەلدى. ايتالىق، يەرۋساليم جانە يران ماسەلەلەرىندە ورتاق پىكىرگە كەلە المادى. يران مەن يزرايل اراسىنداعى ۇزاقتان بەرى جالعاسقان تۇسىنبەستىك پەن سەنىم، ۇستانىم قايشىلىقتارىندا ماكرون تۇسىنىستىك ءۇشىن باتىل ديپلوماتيالىق قادامدار جاساۋ تۋرالى ۇسىنىستارىن، يزرايل باسشىسى تەرىستەپ، ەكى ەل اراسىنداعى ارازدىقتىڭ سالماعىن يران تارابىنا اۋداردى.

جاقىندا عانا اقش پرەزيدەنتى ترامپتىڭ يەرۋساليم شەشىمىنەن كەيىن قالىپتاسقان جاعدايعا بايلانىستى، ماكرون ترامپ شەشىمىنىڭ ءوڭىر تۇراقتىلىعىنا كەرى اسەرىن تيگىزگەنىن العا تارتقان. بۇل ماسەلە دە نەتانياحۋ جاعىنان تەرىستەلدى.

ەستەرىڭىزگە سالا كەتەيىك، يزرايل پرەمەرى ەۋروپا ساپارىنىڭ الدىندا جاساعان مالىمدەمەسىندە فرانتسيانىڭ يەرۋساليم ماسەلەسى جونىندەگى ايىپتاۋىن «ەكىجۇزدىلىك» دەپ باعالاعان بولاتىن.

“The qazaq Times”