قىرعىز حالقى اسقار اقاەۆتى جۇمىرتقامەن اتقىلادى (ۆيدەو)

گەرمانيا استاناسى بەرلين قالاسىندا قىرعىزستاننىڭ ەكس-پرەزيدەنتى اسقار اقاەۆ پەن ونىڭ وتباسىن جۇمىرتقامەن اتقىلادى – دەپ حابارلايدى AKIpress اقپارات كوزى.

جەلتوقسان ايىنىڭ 9-ى كۇنى بەرلين قالاسىندا قىرعىزستاننىڭ ەكس-پرەزيدەنتى اسقار اقاەۆ KyrgyzClub Germany بىرلەستىگىنىڭ ۇيىمداستىرۋىمەن گەرمانيادا تۇراتىن قىرعىز دياسپوراسىمەن كەزدەسكەن. اقاەۆ وتانداستارىمەن كەزدەسۋگە ايەلى مەيرام اقاەۆا مەن قىزى بەرمەتپەن بىرگە كەلگەن. بەرلين كوشەسىندە جينالعان ونشاقتى قىرعىزستاندىق اقاەۆتى «اقاەۆ كەت!» دەگەن پلاكاتتارمەن كۇتىپ العان. وسىدان كەيىن اسقار اقاەۆ ەشكىمنىڭ سۇراعىنا جاۋاپ بەرمەيتىنىن ايتىپ، كەزدەسۋدەن كەتپەك بولعان. وسى ساتتە نارازى توپ مۇشەلەرى اقاەۆ پەن ونىڭ وتباسى مۇشەلەرىن جۇمىرتقامەن اتقىلاعان.

ەستەرىڭىزگە سالايىق، اسقار اقاەۆ بيلىك باسىنان 2005 جىلى رەۆوليۋتسيادان سوڭ كەتكەن بولاتىن. ونىڭ ورنىنا پرەزيدەنتتىك قىزمەتكە قۇرمانبەك باكيەۆ كەلگەن. بىراق ول دا كوپ ۇزاماي 2010 جىلى كەزەكتى رەۆوليۋتسيادان كەيىن قىزمەتىنەن كەتىپ، ەلدەن قاشۋعا ءماجبۇر بولعان.

“The Qazaq Times”