يەرۋساليم ماسەلەسى – تاياۋ-شىعىستاعى سوعىس قاتەرى

قۇراما شتات يەرۋساليم قالاسىن يزرايل استاناسى دەپ تانىعاننان كەيىن اقش-تىڭ وداقتاس ەلدەرى دە پرەزيدەنت ترامپتى قاتاڭ سىنعا الدى. ال، اق ءۇي جاق ۆيتسە-پرەزيدەنت مايك پەنس ارقىلى پالەستينا پرەزيدەنتىن بەيبىتشىلىك كەلىسىمىنەن باس تارتپاۋعا شىقىردى. وسىدان بۇرىن ابباس ءوزىنىڭ مايك پەنسپەن جەلتوقسان ايىنىڭ سوڭىندا بولاتىن كەلىسسوزدەرىن كۇشىنەن قالدىراتىنىن بىلدىرگەن ەدى. ۋاشينگتون جاق ابباستىڭ بۇل شەشىمى بەيبىتشىلىكتى ساقتاۋعا كەرى اسەر ەتەتىنىن العا تارتۋدا. يەرۋساليم قايشىلىعىن BBC-ءدىڭ رەسمي سايتى ساراپتاعان بولاتىن.

ترامپتىڭ شەشىمى قۇراما شتاتتىڭ تاياۋ-شىعىس جانە يەرۋساليم قالاسىنا قاراتقان نەشە ون جىلدان بەرگى ۇستانىمىن بۇتىندەي وزگەرتتى. مايك پەنسپەن بولاتىن ديالوگتى پالەستينانىڭ بىرقاتار جوعارى لاۋازىمدىلارى كۇشىنەن قالدىراتىندارىن جاريا ەتكەن. يزرايل ءوز تاۋەلسىزدىگىن جاريالاعاننان تارتىپ، اقش پرەزيدەنتتەرى نازىك تە، داۋلى يەرۋساليم ماسەلەسىن كەلىسسوز ارقىلى شەشۋ ءپرينتسيپىن ۇستانىپ كەلگەن.

پالەستينا-يزرايل جەرىندە نارازىلىق شەرۋلەرى قاقتىعىسقا ۇلاسۋدا. حابارعا قاراعاندا، گازا سەكتورى ماڭىندا ۇيىمداستىرىلعان نارازىلىق شەرۋىندە يزرايل قارۋلىلارى پالەستينالىقتارعا جاساۋراتقىش گاز قولدانعان ءارى وق اتقان. دەمونستراتسيا قازىردە جالعاسۋدا، مالىمەتتەرگە سۇيەنسەك 31 پالەستينالىق جاراقات العان. پالەستينانىڭ «حاماس» ۇيىمى جاڭا قوزعالىس باستاعاندارىن جاريالادى. يزرايل قارۋلىلارىنىڭ سانىن بارعان سايىن كوبەيتە تۇسۋدە.

قۇراما شتاتتىڭ جاڭا شەشىمىنە ونىڭ ەڭ جاقىن وداقتاس ەلدەرى دە قارسىلىق تانىتۋدا. بىرقاتار باتىس ەلدەرى مەن اراب ەلدەرى نارازىلىق ءبىلدىرىپ، بۇۇ قاۋىپسىزدىك كەڭەسىنىڭ جانە اراب ليگاسىنىڭ كەزەكتەن تىس وتىرىسىن وتكىزىپ، اقش-تىڭ شەشىمىنە قارسىلىق بىلدىرمەك.

يەرۋساليم يزرايل مەن پالەستينا اراسىنداعى ەڭ باستى قايشىلىقتىڭ ءبىرى. ادامزات وركەنيەتى مەن مادەنيەتىندە ماڭىزى زور بۇل قالادا سەميتتەردىڭ بارلىق دىندەرىنىڭ تاريحي قۇندى جادىگەرلەرى مەن كيەلى ورىندارى بار. يۋدەيلەر، حريستياندار، مۇسىلماندار اراسىندا يەرۋساليم ءۇشىن تالاس بىرنەشە مىڭ جىلعا جالعاسىپ كەلەدى. 1967 جىلى تاياۋ-شىعىستاعى سوعىس كەزىندە يزرايل يەرۋساليم قالاسىنىڭ شىعىسىن باسىپ العان. 1980 جىلدان بەرى ءيزرايلدىڭ ورتالىق قالاسى ەتۋگە قۇلشىنىپ كەلەدى. 1967 جىلدان بەرى يزرايل يەرۋساليمنىڭ شىعىسىندا ونداعان ەلدى مەكەندەر سالىپ، 200 مىڭ حالىقتى قونىستاندىرعان.

“The Qazaq Times”