قر ەنەرگەتيكا ءمينيسترى قانات بوزىمباەۆ استانادا ءوتىپ جاتقان جاھاندىق ينۆەستيتسيا جونىندەگى دوڭگەلەك ۇستەلدىڭ كۋلۋارىندا جانارماي وتىنىنا قاتىستى پىكىرىن ءبىلدىردى، دەپ حابارلايدى sputniknews.kz.

"بەنزين باعاسى تۇراقتالدى. ءبىز ءبىر-ەكى كۇندە ەلدەگى ءىرى مۇناي ءوندىرۋشى زاۋىتتار جانە بىرنەشە ءىرى كومپانيالارمەن كەزدەسەتىن بولامىز، بالانستى قارايمىز. ەگەر مۇناي باعاسى مەن ونى ەكسپورتتاۋ باعاسى كوتەرىلەتىن بولسا بۇل ىشكى نارىقتاعى باعاعا دا ىقپال ەتۋى مۇمكىن. جىلدىڭ اياقتالۋىنا 25 كۇن قالدى، بەنزين باعاسى وسپەۋى كەرەك دەپ ويلايمىن. تومەندەۋى مۇمكىن", - دەدى بوزىمباەۆ جۋرناليستەردىڭ قويعان سۇراعىنا.

سونداي-اق، ول ەاەو-نىڭ تەحنيكالىق رەگلامەنتى بويىنشا 2018 جىلدان باستاپ قازاقستاندا ك2 كلاستى بەنزيندى قولدانۋعا تىيىم سالىنادى. ءبىرىنشى توقساندا اۋىسۋ كەزەڭى بولعاندىقتان،  ك4-ك5 كلاستى بەنزيندى قولدانۋ تەك ەكىنشى توقساننان باستالادى.

“The Qazaq Times”