قازاقستاندىق بانكتەردىڭ تابىسى ارتا باستادى

قازاقستانداعى بانك سەكتورىنىڭ شىعىندارى 2017 جىلدىڭ قاڭتار-قىركۇيەك ايىندا كوبەيگەنمەن، قازان ايىندا قارجى ينستيتۋتتارىنىڭ قىزمەتى قايتادان قالىپقا كەلە باستاعان، دەپ حابارلايدى Ranking.

قر ەدب-نىڭ جالپى جەكەمەنشىك كاپيتالى 2017 جىلدىڭ قازان ايىنىڭ سوڭىندا قايتا قالىپقا كەلىپ، 3 ترلن تەڭگەنى قۇراعان. ال شىلدە ايىندا بۇل كورسەتكىش 2,8 ترلن تەڭگەگە دەيىن ازايعان ەدى. ءبىر اي ىشىندە ەكىنشى دەڭگەيلى بانكتەردىڭ جەكە كاپيتالى  4,7%-عا (135 ملرد تەڭگە),  ءبىر جىلدا 6,9%-عا (194 ملرد تەنگە) وسكەن.

قازاقستاندا جۇمىس ىستەپ جاتقان 33 بانكتىڭ بەسەۋى جەكە كاپيتالىنىڭ كولەمىن ازايتقان. ال كوبەيتكەندەر - ەۋرازيالىق بانك (73,1 ملرد تەڭگەدەن (80,3%) 164,2 ملرد تەڭگەگە دەيىن). ءبىر جىل ىشىندە ءوسىم 75,6 ملرد تەڭگە (85,4%) بولعان.

ءوسىم بايقالعان بانكتەردىڭ ءبىرى - تسەسنابانك. ءبىر ايدا بانكتىڭ جەكە كاپيتالى 31 ملرد-تان (17,1%) 212,8 ملرد تەڭگەگە دەيىن ۇلعايعان. تيىسىنشە جەكە كاپتيال كولەمى بويىنشا اتالعان بانك ەكىنشى ورىنعا كوتەرىلگەن.

ال حالىق بانك بولسا جەكە كاپيتالىن ارتتىرعان بانكتەر اراسىندا ءۇشىنشى ورىندا تۇر. جەكە كاپيتالىنىڭ ءوسىمى 10,9 ملرد  تەڭگەنى قۇرادى، جالپى كولەمى 752,5 ملرد تەڭگە. دەگەنمەن جەكە كاپيتالىنىڭ جالپى كولەمى بويىنشا حالىق بانك ءبىرىنشى ورىندا.

جالپى تابىس تۋرالى ايتار بولساق، 2017 جىلدىڭ قاڭتار-قازان ايىندا بانكتەردىڭ ءوسىمى 10 ملرد تەڭگەنى قۇرادى. 9 ايداعى جالپى شىعىن - 122,8 ملرد تەڭگە.

دەگەنمەن 2017 جىلدىڭ قازان ايىنىڭ سوڭىندا قازاقستانداعى 33 بانكتىڭ 29-ى تابىستى بولعان. تەك قازكوم شىعىنى بانك سەكتورىنداعى تابىستىڭ ازايۋىنا ىقپال ەتكەن.

“The Qazaq Times”