ءۇش قىتايلىق حاكەر «اقش-تىڭ ماڭىزدى دەرەكتەرىن ۇرلادى» دەپ ايىپتالدى

دۇيسەنبى كۇنى جاريالانعان ايىپتاۋ اكتىسىندە اقش ادىلەت دەپارتامەنتى ۇش قىتايلىقتىڭ ۇستىنەن «Moody's Analytics جانە Siemens AG-گە كيبەر-شابۋىل جاساپ، قۇپيا دەرەكتەردى ۇرلادى» دەگەن ايىپ تاقتى. ولاردىڭ سوڭعى شابۋىلى 2017 جىلدىڭ مامىر ايىندا جاسالعانى انىقتالعان. بۇل تۋرالى «WSJ» باسىلىمى حابارلادى.

سوت قۇجاتتارىندا كورسەتىلۋىنشە، ءۇش حاكەردىڭ ماقساتى - Moody's ساراپتاپ شىعارعان «ىقپالدى ەكونوميست» تالداۋىنىڭ دەرەكتەرىن قولعا ءتۇسىرۋ. 2011 جىلدان باستاپ ولار ەكونوميستەردىڭ ەلەكتروندى پوشتاسىنا كەلگەن بارلىق قۇجاتتاردى ءوز ەلەكتروندى پوشتاسىنا جىبەرىپ وتىرعان. تەك ايىپتاۋ قۇجاتىندا ەكونوميستەردىڭ ەسىمدەرى كورسەتىلمەگەن. ءۇش حاكەر Siemens كومپيۋتەرلىك جەلىلەرىنە شابۋىلداپ كىرىپ، 407 گب-عا جۋىق جەكە مەنشىك بيزنەس دەرەكتەرىن ۇرلادى دەپ ايىپتالىپ وتىر.

اقش ادىلەت دەپارتامەنتىنىڭ ءباسپاسوز مالىمدەمەشىسىنىڭ ايتۋىنشا، ايىپتالعان ءۇش حاكەر قىتايدا تۇراتىندىقتان اقش تارابى ءالى قولعا تۇسىرمەگەن. ادىلەت دەپارتامەنتى بۇل ءىستىڭ 2014 جىلعى جەلىلىك شابۋىلعا ۇقسايتىنىن دا العا تارتتى. سول كەزدە اقش-تىڭ ۇكىمەتتىك كومپيۋتەرلەرىنەن ساۋدا قۇپيالارىن ۇرلادى دەگەن ايىپپەن بەس قىتايلىق اسكەري قىزمەتكەردى ايىپتاعان ەدى. وسى ايىپتالعان اسكەري قىزمەتكەرلەر اقش جاعىنان تۇتقىندالمادى، بىراق اقش شەنەۋنىكتەرىنىڭ ايتۋىنشا، كۇدىكتىلەردى تاۋىپ، ولاردىڭ اتىنا ايىپتاۋ تاراتۋ بۇل ارەكەتتى ءونىمدى تۇردە تەجەيدى.

دۇيسەنبى كۇنى جاريالانعان ايىپتاۋ قۇجاتىندا، ءۇش كۇدىكتىنىڭ قىتاي ۇكىمەتىمەن قانداي دا ءبىر بايلانىسى تۋرالى ايتىلماعان. ايىپتالعان ۋ يڭجۋو (Wu Yingzhuo), دوڭ حاۋ (Dong Hao) جانە شيا لەي (Xia Lei) اتتى ءۇش قىتاي ازاماتى گۋاڭجوۋ قالاسىنداعى Bo Royal Information Technology Co.، Ltd. دەپ اتالاتىن جەلىلىك قاۋىپسىزدىك قىزمەت كورستەۋشى كومپانيادا جۇمىس ىستەيدى. اقش جاق ءۇش ايىپتالۋشىعا تىكەلەي حابارلاسىپ تۇسىنىكتەمە تالاپ ەتكەن جوق.

“The Qazaq Times”