اقش ادىلەت دەپارتامەنتى كەشە قىتايلىق حاكەرلىك ۇيىمنىڭ كيبەر-شابۋىلدارىنا قارسى ۇيلەستىرىلگەن جانە اۋقىمدى شارالارىن جاريا ەتتى. ناتيجەسىندە، بەس قىتايلىق حاكەر جاۋاپقا تارتىلعان جانە ولارعا كومەكتەستى دەگەن ايىپپەن ەكى مالايزيالىق كاسىپكەر قاماۋعا الىنعان. ادىلەت دەپارتامەنتى بۇل حاكەرلەردىڭ كيبەر شابۋىلدارىن توقتاتۋ ءۇشىن Microsoft, Facebook جانە Google سياقتى جوعارى تەحنولوگيالىق كومپانيالارمەن ىنتىماقتاستىق ورناتىپ جاتقانىن مالىمدەدى.

اقش باس پروكۋرورىنىڭ ورىنباسارى دجەففري روزەن كەشەگى ءباسپاسوز كونفەرەنتسياسىندا «Advanced Persistent Threat 41 (APT 41)» دەپ اتالاتىن حاكەرلىك توپتىڭ زياندى كيبەرشابۋىلدارىنا قارسى «ۇيلەستىرىلگەن جانە اۋقىمدى ءىس-قيمىلدار» جاسايتىنىن مالىمدەدى. ونىڭ ايتۋىنشا، العاشقى ادىمدا 3 سوت ءىسى قوزعالعان، قىتايلىق بەس ازامات كومپيۋتەرلەردى بۇزعانى ءۇشىن ايىپتالعان، ال ەكى مالايزيالىق ازاماتقا حاكەرلىك ماقساتتاردى ورىنداۋعا قولداۋ كورسەتكەن جانە حاكەرلەر تابىسىن ساقتاعان دەگەن ايىپتار تاعىلعان.

اقش جاعىنان جاۋاپقا تارتىلعان قىتايلىقتار APT 41 اتتى حاكەرلىك توپتىڭ مۇشەلەرى. ادىلەت دەپارتامەنتىنىڭ مالىمەتىنە قاراعاندا، ولار الەمنىڭ ءار تۇكپىرىندەگى ءتۇرلى سالا وكىلدەرىنەن جۇزدەگەن نىساناعا شابۋىل جاساعان، وكىنىشكە وراي ولاردىڭ شابۋىل نىسانىنا اينالعان ءالى دە انىقتالماعان جەكە تۇلعالار مەن كومپانيالار كوپ. ولار ەلەكتروندى ويىنداردى جاساۋشى كومپانيالارعا شابۋىل جاساپ، ولاردان ۇرلاعان تەحنولوگيا تابىستارىن قارا نارىقتا ساتىپ وتىرعان.

ايىپتالعان بەس قىتايلىق حاكەرلەر: جاڭ حاۋران، تاڭ دايدين، چيان چۋان، فۋ چياڭ، جياڭ ليجى.

اقش تارابى APT 41 حاكەرلىك توپتى قىتايدىڭ سوڭعى جىلدارى ىسكە اسىرعان ەڭ ءىرى كيبەر-تىڭشىلىق جوباسى دەپ سانايدى. ولاردىڭ الەۋمەتتىك جەلىلەرگە، تولەم باعدارلامالارىنا شابۋىل جاساۋ، جابىرلەنۋشىدەن تولەم تالاپ ەتۋ سەكىلدى ارەكەتتەرىنەن اقش، اۋستراليا، برازيليا، گەرمانيا، ءۇندىستان، جاپونيا جانە شۆەتسيادا قاتارلى ەلدەردەگى كومپانيالار زارداپ شەككەن.

“The Qazaq Times”