ءسۇريا اسكەرىنىڭ اۋە سوققىسىنان بەيبىت تۇرعىندار قازا تاپتى

ءسۇريا اسكەرىنىڭ اۋە سوققىسىنان 23 بەيبىت تۇرعىن قازا تاپتى. وپپوزيتسيالىق باسقىنشى توپتار شوعىرلانعان شىعىس گۋتا ايماعىندا بولعان اۋە شابۋىلدارى ءسۇريا ۇكىمەتىنىڭ جەنەۆا كەلىسسوزدەرى الدىندا ءوز قارسىلاستارىنا  اسكەري قىسىمدى ارتتىرىپ وتىرعانىن بايقاتادى. بۇل تۋرالى ۆۆس اقپاراتتىق اگەنتتىگى جازدى. 

Syrian Observatory for Human Rights ۇيىمى اۋىر جاراقات العان ازاماتتاردىڭ كوپتىگىنە بايلانىستى، الداعى ۋاقىتتا قۇرباندار سانى ارتۋى مۇمكىن ەكەنىن حابارلادى. سونداي-اق، قۇقىق قورعاۋ ۇيىمىنىڭ دەرەگىنشە، بۇل ايماقتا بولىپ جاتقان قاقتىعىستاردان سوڭعى ەكى اپتا ىشىندە جۇزگە جۋىق ادام مەرت بولعان.

Anadolu اقپاراتتىق اگەنتتىگىنىڭ حابارلاۋىنشا، ءسۇريا اسكەرى وپپوزيتسيالىق توپتار بەكىنگەن ميسرابا، حاراستا، ەين-تارما اۋداندارىن بومبىلاعان. قازىر نىساناعا ءىلىنىپ وتىرعان شىعىس گۋتا ايماعى نەگىزىنەن رەسەي، يران مەن تۇركيا اراسىنداعى كەلىسىمگە سايكەس، دەسكالاتسيالىق (وق اتۋعا بولمايتىن) ايماق دەپ جاريالانعان ەدى.

ەۋروپا كونسۋلدىعىنىڭ وكىلى گۇنەي يىلدىزدىڭ پىكىرىنشە، شامامەن 300 مىڭعا جۋىق تۇرعىنى بار شىعىس گۋتا ايماعى داماسكىگە جاقىن ورنالاسقاندىعى ءۇشىن ءسۇريا ۇكىمەتىنىڭ ەرەكشە نازارىنا ءىلىنىپ وتىر. سونداي-اق ديپلومات ء"سۇريا ۇكىمەتى جەنەۆا كەلىسسوزدەرىنىڭ الدىندا ءوز قارسىلاستارىن بارىنشا السىرەتۋدى كوزدەپ وتىرعان سياقتى" دەگەن وي قوستى.

“The Qazaq Times”