فوتو: Facenews.ua

مۇناي باعاسى ۆلاديمير ءپۋتيننىڭ باقىلاۋىندا – دەپ جازدى Bloomberg گازەتى.

باسىلىم مالىمەتىنشە، وتكەن جىلى وپەك ەلدەرى ۇيىمعا مۇشە ەمەس مەملەكەتتەرمەن مۇناي ءوندىرۋدى ازايتۋعا بايلانىستى سوڭعى 15 جىلدا بولماعان كەلىسىمگە كەلگەن. بۇل كەلىسىمدە رەسەيدىڭ الاتىن ورىنى ەرەكشە بولعان. سەبەبى اتالمىش كەلىسىمنەن كەيىن ماسكەۋ جارتى جىل بويى وزىنە مىندەتتەلگەن بارلىق تالاپتاردى ورىنداپ، مۇناي ءوندىرۋدى كەلىسىم بويىنشا كۇنىنە 11 ملن باررەلدەن اسىرماعان. بۇل الەمدە مۇناي وندىرۋدەن ءبىرىنشى ورىن الاتىن ساۋد ارابياسىنا داعدارىستان شىعۋعا ۇلكەن كومەك بولعان. وسى كەلىسىمنەن كەيىن رەسەيدىڭ الەمدىك مۇناي وندىرىسىندەگى ءرولى ارتقان. ويتكەنى رەسەي وپەك ەلدەرىمەن مۇناي ءوندىرۋدى ازايتۋعا كەلىسكەننەن كەيىن، قارا التىن باعاسى وسكەن.

Bloomberg ساراپشىلارىنىڭ ويىنشا، قازىر ساۋد ارابياسى رەسەيدىڭ كوزقاراسىمەن ساناسۋعا ءماجبۇر. سەبەبى رەسمي ەر-رياد ەكونوميكاسى مۇنايعا تاۋەلدى. ال ساۋد ارابياسىنىڭ قازىرگى باسشىسى حانزادا مۇحامماد بەن سالماننىڭ بيلىك باسىندا وتىرۋى تىكەلەي تۇراقتى ەكونوميكاعا بايلانىستى.

“The Qazaq Times”