سوورونباي جەەنبەكوۆ قىرعىز حالقىنىڭ الدىندا انت قابىلدادى

سوورونباي جەەنبەكوۆ قىرعىزستان پرەزيدەنتى قىزمەتىنە كىرىستى. پرەزيدەنتتىڭ يناۋگۋراتسيا سالتاناتى "الا-ارچا" رەزيدەنتسياسىندا ءوتتى. رەسپۋبليكانىڭ جاڭا پرەزيدەنتى ەلدىڭ مۇددەسىن ءبىرىنشى ورىنعا قويۋعا سالتاناتتى تۇردە ۋادە بەردى، دەپ حابارلايدى 24.kg.

بۇدان بولەك، ول ەل بيلىگىنە قاتاڭ تالاپتار قوياتىن بولادى. ول سوزىندە: "دەموكراتيانىڭ ەكى سەرىگى بار: ءبىرىنشىسى - ەركىندىك، ەكىنشىسى - جاۋاپكەرشىلىك. مەن حالىق الدىنداعى مىندەتىمدى ورىنداۋ ءۇشىن بار ۋاقىتىم مەن كۇشىمدى جۇمسايمىن", - دەدى.

سونداي-اق، قىرعىزستاننىڭ جاڭا پرەزيدەنتى جەمقورلىقپەن كۇرەس جۇرگىزگە جانە سوت جۇيەسىنىڭ اشىق بولۋىن قامتاماسىز ەتۋگە ۋادە بەردى. «ءبىز سوت ينفراقۇرىلىمىن ەداۋىر جاقسارتىپ، تسيفرلى ءادىل سوت جۇيەسىن ەنگىزۋىمىز كەرەك، سوندا عانا سۋديالار اشىق ءارى جاۋاپتى بولادى»، - دەدى سوورونباي جەەنبەكوۆ.

ەندى جەەنبەكوۆ بەرگەن ۋادەسى بويىنشا ءبىرىنشى جارلىعىندا ەكس-پرەزيدەنت المازبەك اتامباەۆتى ماراپاتتاۋى ءتيىس. ال اتامباەۆ بولسا قىرعىز ەلىنەن سەنىمدەرىن اقتاماعان بولسا كەشىرىم سۇرايتىنىن ايتتى.

قىرعىزستاندا پرەزيدەنت سايلاۋى 15 قازان كۇنى ءوتىپ، سوورونباي جەەنبەكوۆ 54,77 پايىز داۋىسپەن جەڭىسكە جەتتى.

ايتا كەتەيىك، قىرعىزستاندا سايلاۋدىڭ وتۋىنە از قالعاندا قازاقستان مەن قىرعىزتان اراسىنداعى ساياسي، ەكونوميكالىق جاعداي شيەلەنىسە ءتۇستى. بۇل قازاقستان پرەزيدەنتى نۇرسۇلتان نازارباەۆ قىرعىز پرەزيدەنتتىگىنە ۇمىتكەر ومىربەك بابانوۆپەن كەزدەسكەنەن كەيىن باستالعان. وسىدان كەيىن المازبەك اتامباەۆ رەسمي استانانى "ەلدىڭ ىشكى ساياساتىنا قول سۇقتى" دەپ ايىپتاپ، قازاقستانعا قارسىلىق نوتاسىن جىبەرگەن. قازاقستان تاراپى قىرعىز بيلىگىنىڭ بۇل قارسىلىعىن نەگىزسىز ەكەندىگىن ايتىپ، جاۋاپ قاتقان بولاتىن. بىراق ەكى ەل اراسىنداعى داۋ بۇنىمەن اياقتالماعان. قىرعىزستانداعى پرەزيدەنت سايلاۋىنا دەيىن دە، كەيىن دە اتامباەۆ ءوزىنىڭ ءار مالىمدەمەسىندە قازاقستان بيلىگىن سىناۋىن توقتاتپاۋدا.

“The Qazaq Times”