فوتو عالامتور بەتتەرىنەن الىندى.

ۆۆس اقپاراتتىق اگەنتتىگىنىڭ ءتىلشىسى Lyse Doucet - ساۋد ارابياسىنىڭ جەمقورلىققا قاتىسى بار دەگەن ايىپپەن قۇرىقتالعان حانزادالارى جاتقان ەڭ قىمبات قوناق ۇيلەردىڭ ءبىرى Ritz Carlton "اباقتىسىنا" كىرۋگە رۇقسات العان ەڭ ءبىرىنشى جۋرناليست. مەملەكەت باسشىسى مۇحاممەد بين سالماننىڭ باستاماسىمەن پاراقورلىققا قارسى كۇرەس اياسىندا قولعا تۇسىرىلگەن شەنەۋنىكتەر مەن بەلدى ساياسي تۇلعالار ءوز جازاسىن وسى داۋلەتتى مەكەندە وتەپ جاتىر. 

الەمدەگى ەڭ باعالى قوناق ۇيلەردىڭ ءبىرى 4 قازاننان بەرى "التىن اباقتىعا" اينالدى. مەملەكەتتىڭ قىرىنا ىلىككەندەردىڭ اتى-ءجونى تولىق جاريالانباعانىمەن، مۇندا 200-گە جۋىق ساۋد ارابياسى بيلىگىندەگى سالماقتى تۇلعالار اكەلىنگەن. ايىپتالعانداردىڭ ەسىمدەرى بەلگىسىز تىزىمدە "11 حانزادا بار، ولاردىڭ ەكەۋى مۇحاممەد بين سالماننىڭ جيەندەرى" دەگەن دەرەك تە جوق ەمەس.

ۆۆس ءتىلشىسى ءوزىنىڭ قانشاما تۇرمە مەن باس بوستاندىعىنان ايىرۋ ورىندارىنا بارىپ ءجۇرىپ، مۇنداي التىننان جاسالعان "اباقتىنى" العاش كورىپ وتىرعانىن ايتادى. مۇندا قىلمىسكەرلەردىڭ قامسىز ءومىرى ءۇشىن بارلىق جاعداي جاسالعان. ساۋد ارابياسىنىڭ رەسمي وكىلدەرى بەرگەن اقپاراتقا سايكەس، 4 قازان كۇنى ءتۇن ورتاسىندا وسىندا جەتكىزىلگەن شەندى تۇلعالار العاشىندا مۇنى ارنايى ۇيىمداستىرىلعان "شوۋ" دەپ ويلاپتى. كەيىننەن مۇندا قالۋدان باس تارتىپ، قارسىلىق بىلدىرگەندەرى دە تابىلعان.

ۆۆس ءتىلشىسىنىڭ سوزىنشە، شەنەۋنىكتەر بۇل جەردەن بوساپ شىعۋ ءۇشىن كەلىسىمگە كەلۋگە دايىن ەكەن. ۇكىمەتتى جاپپاي تازارتۋ ءىسى نەگە ءدال قازىر باستالدى دەگەن ساۋالعا ءتىلشى ساۋد ارابياسىنداعى جەمقورلىقتى اۋىزدىقتاۋ كوپتىڭ كوكەيىندە جۇرگەن باستى ماسەلە بولعانىن ايتادى. سونداي-اق وسى شەشىمى ارقىلى مۇحاممەد بين سالمان ءوز جاۋلارىنىڭ قاتارىن ارتتىرىپ الۋى مۇمكىن دەگەن بولجام جاسايدى.

“The Qazaq Times”