بوسنياداعى گەنوتسيد ءۇشىن راتكو ملاديچ «ءومىر بويى باس بوستاندىعىنان ايىرۋ» جازاسىنا كەسىلدى

بوسنيالىق سەربتەردىڭ كومانديرى راتكو ملاديچ 1990 جىلدارى بوسنيا سوعىسىندا مۇسىلماندارعا جاساعان گەنوتسيدى ءۇشىن ءومىر بويى باس بوستاندىعىنان ايىرىلۋ جازاسىنا كەسىلدى. گااگاداعى بۇۇ تريبۋناسى ونى 11 ايىپتىڭ 10-ى بويىنشا كىنالى دەپ تاپتى. ساراەۆوداعى بەيبىت تۇرعىنداردىڭ ءولىمى ءۇشىن "بوسنيا قاساپشىسى" دەگەن لاقاپ ات العان 74 جاستاعى راتكو ملاديچ سوت توراعاسىنا داۋىس كوتەرگەنى ءۇشىن وتىرىس زالىنان الىستاتىلدى. 

راتكو ملاديچ بوسنيالىق سەربتەردىڭ بوسنيالىق حورۆاتتار مەن بوسنيا اسكەرىنە قارسى قاقتىعىسىندا قولباسشى بولعان. ونى ءىسىن حالىقارالىق سوت 2012 جىلدان بەرى قاراستىرىپ كەلەدى. راتكو ملاديچ 1995 جىلى سرەبرەنيتسادا 7 مىعا جۋىق بوسنيالىق ەر ازاماتتار مەن بالالار ولتىرىلگەن قاندى وقيعا ءۇشىن ايىپتالدى. بۇل وقيعا ەكىنشى دۇنيەجۇزىلىك سوعىستان كەيىن ەۋروپا جەرىندە بولعان ەڭ ۇلكەن گەنوتسيد دەپ ەسەپتەلەدى.

راتكو ملاديچكە تاعىلعان جانە سوتتىڭ شەشىمىمەن راستالعان ايىپتاردىڭ قاتارىندا بوسنيالىق ايەلدەردى جاپپاي زورلاۋ، مۇسىلمانداردىڭ قۇلشىلىق ورىندارى مەن مەشىتتەردى ورتەۋ، ساراەۆودا بەيبىت حالىققا قارسى تەرراكت ۇيىمداستىرۋ، تۇتقىنداردى ادام توزگىسىز جاعدايدا ۇستاۋ، اشتىق، ت.ب. قىلمىستار بار. ونىڭ ۇكىمىن سرەبرەنيتساعا جاقىن ماڭداعى قوعامدىق ورىندا گەنوتسيد قۇرباندارىنىڭ جاقىندارى جينالىپ، تىڭدادى. سوتتىڭ شەشىمى جاريالانعان كەزدە، ولار قۋانا قوشتاپ، ايقايلادى.

راتكو ملاديچ 1995 جىلعى قاندى وقيعادان كەيىن جاسىرىنىپ، پوليتسيا قىلمىسكەردى 16 جىل بويى ىزدەگەن. تەك 2011 جىلى عانا قولعا تۇسكەن بۇرىنعى اسكەرباسشى ەندى قالعان ءومىرىن اباقتىنىڭ ار جاعىندا وتكىزەدى.

“The Qazaq Times”