Foto: 112ua

Bosniyalıq serbterdiñ komandiri Ratko Mladiç 1990 jıldarı Bosniya soğısında mwsılmandarğa jasağan genocidi üşin ömir boyı bas bostandığınan ayırılu jazasına kesildi. Gaagadağı BWW tribunası onı 11 ayıptıñ 10-ı boyınşa kinäli dep taptı. Saraevodağı beybit twrğındardıñ ölimi üşin "Bosniya qasapşısı" degen laqap at alğan 74 jastağı Ratko Mladiç sot törağasına dauıs kötergeni üşin otırıs zalınan alıstatıldı. 

Ratko Mladiç bosniyalıq serbterdiñ bosniyalıq horvattar men Bosniya äskerine qarsı qaqtığısında qolbasşı bolğan. Onı isin halıqaralıq sot 2012 jıldan beri qarastırıp keledi. Ratko Mladiç 1995 jılı Srebrenicada 7 mığa juıq bosniyalıq er azamattar men balalar öltirilgen qandı oqiğa üşin ayıptaldı. Bwl oqiğa Ekinşi Düniejüzilik soğıstan keyin Europa jerinde bolğan eñ ülken genocid dep esepteledi.

Ratko Mladiçke tağılğan jäne Sottıñ şeşimimen rastalğan ayıptardıñ qatarında bosniyalıq äyelderdi jappay zorlau, mwsılmandardıñ qwlşılıq orındarı men meşitterdi örteu, Saraevoda beybit halıqqa qarsı terrakt wyımdastıru, twtqındardı adam tözgisiz jağdayda wstau, aştıq, t.b. qılmıstar bar. Onıñ ükimin Srebrenicağa jaqın mañdağı qoğamdıq orında genocid qwrbandarınıñ jaqındarı jinalıp, tıñdadı. Sottıñ şeşimi jariyalanğan kezde, olar quana qoştap, ayqayladı.

Ratko Mladiç 1995 jılğı qandı oqiğadan keyin jasırınıp, policiya qılmıskerdi 16 jıl boyı izdegen. Tek 2011 jılı ğana qolğa tüsken bwrınğı äskerbasşı endi qalğan ömirin abaqtınıñ ar jağında ötkizedi.

“The Qazaq Times”