يەمەنگە گۋمانيتارلىق كومەك جەتكىزىلەتىن بولدى

يەمەندەگى قازىرگى ۇكىمەتتى قولداۋشى ساۋد ارابياسى باستاعان كواليتسيا بۇۇ-نىڭ ەسكەرتپەلەرىنەن كەيىن، گۋمانيتارلىق كومەك ءۇشىن اۋە، قۇرلىق شەكارالارىن اشۋعا رۇقسات بەردى. وتكەن اپتادا تەڭىز پورتتارىنىڭ جۇمىسى جانداندى. وسىعان دەيىن باسقىنشى توپتاردىڭ ەر-ريادقا قارسى بالليستيكالىق زىمىران قولدانعانى ءۇشىن، ساۋد ارابياسى يەمەنگە بلوكادا ورناتقان بولاتىن. 

يەمەندەگى سانا اۋەجايى مەن حۇدايدا پورتى گۋمانيتارلىق كومەك جەتكىزىلۋى ءۇشىن اشىلادى. ەكونوميكاسىنىڭ 80 پايىزى يمپورتقا تاۋەلدى يەمەندە ازىق-تۇلىك قاۋىپسىزدىگىنە بايلانىستى قيىندىقتار بلوكادا باستالعان 6 قازاننان بۇرىن تۋىنداعان بولاتىن. ساۋد ارابياسىنىڭ باسشىسى مۇحاممەد بين سالمان ريادقا قارسى اتىلعان بالليستيكالىق زىمىراندى يران بەرگەن دەگەن ايىپتاۋ ۇسىنىپ ەدى. بىراق يەمەندەگى "حاۋتيس" باسقىنشى توبىن قولداۋشى يراننىڭ باسشىسى حاسان روۋحاني بارلىق بولجامداردى جوققا شىعاردى.

كواليتسيا گۋمانيتارلىق كومەك قابىلداۋ بۇگىننەن باستالاتىنىن جەتكىزدى. ولار سونداي-اق الداعى ۋاقىتتا يەمەن حالقىن اشتىقتان قۇتقارۋ ءۇشىن گۋمانيتارلىق قولداۋ شارالارىن ۇيىمداستىرۋ بويىنشا كولەمدى جوبالارى بار ەكەنىن ايتتى.

بۇۇ مالىمەتىنشە، 20 ملن ادام، ونىڭ ىشىندە 11 ملن بالا اشتىق قاۋپىندە قالىپ وتىر. 14,8 ملن ادام العاشقى مەديتسينالىق كومەككە مۇقتاج. گۋمانيتارلىق كومەككە تولىقتاي تاۋەلدى بولىپ وتىرعان يەمەندە اۋە سوققىلارىنىڭ سەبەبىنەن 8 مىڭ 670 ادام قازا تاۋىپ، 49 مىڭ 960 ادام جارالانعان. ولاردىڭ 60 پايىزى - بەيبىت تۇرعىندار.

“The Qazaq Times”