جاڭا ۇلگىدەگى 500 تەڭگەلىك بانكنوت اينالىسقا ەنەدى

قر ۇلتتىق بانكى 2017 جىلعى 22 قاراشادان باستاپ، 2017 جىلعى ۇلگىدەگى ديزاينى وزگەرتىلگەن نومينالدىق قۇنى 500 تەڭگەلىك بانكنوتتاردى اينالىسقا شىعارادى. بۇل تۋرالى باس بانكتىڭ ءباسپاسوز قىزمەتى حابارلادى. 

بانكنوتتىڭ ديزاينى اينالىستاعى «قازاق ەلى» سەرياسىنىڭ اقشا بەلگىلەرىمەن بىرىڭعاي ستيلدە – بەت جاعىندا باسىم تۇردە تىگىنەن بەينەلەر، ال سىرت جاعىندا كولدەنەڭ تۇرىندە بەينەلەر ورىندالعان. باسىم ءتۇسى – اشىق ءتۇستى كوك. بانكنوتتىڭ ولشەمى – 130ح62 مم.

ايتا كەتەرلىك جايت، بانكنوتانى دايىنداۋ ەرتە باستالعاندىقتان ونداعى جازۋلار كيريلليتساعا نەگىزدەلگەن الىپبيگە سايكەس ورىندالعان.

"ۇلتتىق ۆاليۋتا – تەڭگە بانكنوتتارى مەن مونەتالارىنداعى جازۋلاردى وزگەرتۋ جۇمىسىن ۇلتتىق بانك «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» قازاقستان رەسپۋبليكاسى پرەزيدەنتى ن. ءا. نازارباەۆتىڭ 2017 جىلعى 26 قازانداعى № 569 جارلىعىنا سايكەس
جۇرگىزەتىن بولادى" ، - دەلىنگەن ءباسپاسوز حابارلاماسىندا.

بانكنوتتىڭ بەت جاعى:  نەگىزگى بەينەلەر – بانكنوتتىڭ وڭ جاعىنداعى «قازاق ەلi» مونۋمەنتى جانە ورتاسىندا تومەنگى بولىكتە ۇشىپ بارا جاتقان كوگەرشىندەر.

جوعارى بولىگىندە ورتاسىندا جانە سول جاعىنان قازاقستان رەسپۋبليكاسىنىڭ مەملەكەتتىك رامىزدەرى: مەملەكەتتىك ەلتاڭبا جانە مەملەكەتتىك تۋ بەينەلەنگەن. سول جاقتا تومەندە جانە جوعارى جاقتا نومينالدىڭ تسيفرلىق بەينەلەنۋى، سول جاقتا ورتاسىندا نومينالدىڭ مەملەكەتتىك تىلدەگى ارىپتىك بەينەلەنۋى ورنالاسقان. جوعارى سول جاق بۇرىشىندا «قازاقستان ۇلتتىق بانكى» دەگەن
جازبا، ونىڭ استىندا قولدان جاساعانى ءۇشىن جاۋاپكەرشىلىك تۋرالى ەسكەرتەتىن «بانكنوتتاردى قولدان جاساۋ زاڭمەن قۋدالانادى» دەگەن مەملەكەتتىك تىلدەگى جازبا ورنالاسقان.

بانكنوتتىڭ سىرت جاعى: نەگىزگى بەينەسى – كاسپي تەڭىزى، ونىڭ ارتىندا – قازاقستان كارتاسىنىڭ بەينەسى. سول جاعىندا تومەندە جانە وڭ جاعىندا جوعارىدا بانكنوت نومينالىنىڭ تسيفرلىق بەينەلەنۋى، ال تومەندە ورتاسىندا – ورىس تىلىندەگى ارىپتىك بەينەلەنۋى ورنالاسقان. «پوددەلكا بانكنوت پرەسلەدۋەتسيا پو زاكونۋ» دەگەن
جازبا بانكنوتتىڭ سول جاق بۇرىشىندا ورنالاسقان.

2006 جىلعى ۇلگىدەگى جانە 2017 جىلعى ۇلگىدەگى نومينالى 500 تەڭگەلىك بانكنوتتاردىڭ قاتار قولدانىلۋ كەزەڭى 2017 جىلعى 22 قاراشا – 2020 جىلعى 10 ماۋسىم بولىپ بەلگىلەندى جانە «2006 جىلعى ۇلگىدەگى جانە 2017 جىلعى ۇلگىدەگى نومينالى 500 تەڭگەلىك بانكنوتتاردىڭ قاتار اينالىستا بولۋ كەزەڭىن بەلگىلەۋ تۋرالى» قازاقستان رەسپۋبليكاسى ۇلتتىق بانكى باسقارماسىنىڭ 2017 جىلعى 2 قاراشاداعى № 207 قاۋلىسىنا سايكەس جۇزەگە اسىرىلادى.

2006 جىلعى ۇلگىدەگى جانە 2017 جىلعى ۇلگىدەگى نومينالى 500 تەڭگەلىك بانكنوتتار قاتار اينالىستا بولۋ كەزەڭىندە قازاقستان رەسپۋبليكاسىنىڭ بۇكىل اۋماعىندا زاڭدى تولەم قۇرالى بولىپ تابىلادى جانە تولەمدەر مەن اقشا اۋدارىمدارىنىڭ بارلىق تۇرلەرى بويىنشا قابىلدانۋعا مىندەتتى.

قازاقستان رەسپۋبليكاسىنىڭ ۇلتتىق بانكى زاڭدى تولەم قۇرالى بولىپ تابىلاتىن بانكنوتتار مەن مونەتالاردى قابىلداۋدان باس تارتۋ، اكىمشىلىك قۇقىق بۇزۋشىلىقتار تۋرالى قازاقستان رەسپۋبليكاسىنىڭ كودەكسىنە سايكەس اكىمشىلىك قۇقىق بۇزۋشىلىق بولىپ تابىلاتىنىن ەسكە سالادى.

“The Qazaq Times”