فوتو: ۆۆس

 فرانتسيانىڭ رادياتسيادان قورعانىس  جانە يادرولىق قاۋىپسىزدىك ينستيتۋتى 9 قاراشا كۇنى ەۋروپانىڭ ۇستىندەگى اۋا قۇرامىنان  رۋتين-106 قوسپاسىنىڭ شەكتەن تىس مولشەرى تابىلعانىن حابارلاپ، وعان رەسەي نە قازاقستانداعى راديواكتيۆتى جارىلىس  سەبەپ بولۋى مۇمكىن دەگەن بولجام ۇسىندى. دەگەنمەن رەسەي مەن قازاقستان ۇكىمەتى قوس مەملەكەتتىڭ دە اۋماعىندا ەشقانداي زاۋىتتاردا توتەنشە جاعداي تىركەلمەگەنىن ايتادى. 

رەسەيدىڭ اۋا-رايى قىزمەتىنە جاۋاپتى ماماندارى ورال تاۋلارىنىڭ ۇستىندەگى ءرۋتيننىڭ مولشەرى قالىپتى دەڭگەيدە ەكەنىن جەتكىزدى. فرانتسيا تاراپىنان جاسالعان مالىمدەمەنى رەسەيدەن العاش بولىپ قولداعان "روسگيدرومەت" مەتەوروگيالىق قىزمەتى بولدى. ولاردىڭ ايتۋىنشا، ورال تاۋلارىنىڭ وڭتۇستىگىندەگى ەكى ستانسادا قازان-قاراشا ايلارىندا راديواكتيۆتى يزوتوپپەن لاستانۋ دەڭگەيى قالىپتى مولشەردەن ارتىق ەكەنى بايقالعان.

چەليابينسككە جاقىن اۋماقتا ورنالاسقان "ماياك" ستانساسىندا ءرۋتيننىڭ اۋاداعى كولەمى وتكەن ايمەن سالىستىرعاندا 986 ەسە ارتقانى تىركەلگەن. ماياك ستانساسىنىڭ يادرولىق وتىندى وڭدەۋ بويىنشا ءىرى ورتالىقتاردىڭ ءبىرى ەكەنى بەلگىلى. قازىرشە ءرۋتيننىڭ اۋاعا تارالۋىنا نە سەبەپ بولعانى اقپارات جوق.

“The Qazaq Times”