بەلگىلى قوعام قايراتكەرى، ەكونوميكا عىلىمدارىنىڭ دوكتورى، پروفەسسور باكەي اعىپارۇلى موڭعوليا عىلىم اكادەمياسىنىڭ اكادەميگى بولىپ سايلاندى. بۇل تۋرالى معا-نىڭ ۆەبسايتىنا سىلتەمە جاساپ KAZNEWS حابارلادى.

باكەي اعىپارۇلى بۇل جوعارى عىلىمي اتاققا مال شارۋاشىلىعىنىڭ تيىمدىلىگىن ارتتىرۋ، ەكونوميكالىق جانە مەنەجمەنتتىك باعىتتا 30 جىل عىلىمي زەرتتەۋلەر جاساپ، موڭعوليانىڭ اۋىل شارۋاشىلىعىنىڭ تۇراقتى دامۋىنىڭ ستراتەگيالىق باعىتى، مالشى وتباسىنىڭ ەكونوميكالىق شەشىم قابىلداۋ پروتسەسى، جايىلىم جەرلەردى ۇتىمدى پايدالانۋداعى مەنەجمەنتتىك ۇلگىسىن جاساۋ ماسەلەرى بويىنشا ەڭبەكتەرى ءۇشىن يە بولدى.

باكەي اعىپارۇلى – موڭعوليا پارلامەنتىنە بايان-ولگي ايماعىنان ەكى رەت سايلانىپ، موڭعوليا پارلامەنتىنىڭ تابيعات، قورشاعان ورتا، اۋىل شارۋاشىلىعى جونىندەگى جانە مەملەكەتتىك قۇرىلىمدارى جونىندەگى تۇراقتى كوميتەتتەرىن باسقارعان. اۋىل شارۋاشىلىعى ۋنيۆەرسيتەتىنىڭ پرورەكتورى قىزمەتتەرىن اتقارعان.

قازىر موڭعوليا اۋىل شارۋاشىلىعى اكادەمياسىنىڭ ۆيتسە پرەزيدەنتى.

"The Qazaq Times"