فوتو: Kursiv.kz

ەندى قازاقستاندا بانكتەر مەن ۇيىمدار ازاماتتاردىڭ جەكە دەرەكتەرىنە قول جەتكىزۋگە مۇمكىندىك الادى. بۇل تۋرالى قر اقپارات جانە كوممۋنيكاتسيالار ءمينيسترى داۋرەن اباەۆ مالىمدەدى.

ونىڭ سوزىنشە، ازاماتتاردان ەلەكتروندى انىقتاما تالاپ ەتۋدى الىپ تاستاۋ جوسپارلانعان. "بىرنەشە مەملەكەتتىك ورگانمەن بىرگە Paper free نەمەسە "انىقتاماسىز قىزمەت كورسەتۋ" جوباسىن جۇزەگە اسىرۋ جوسپارلانعان. جوبا  ازاماتتاردان ەڭ قاجەتتى دەگەن ەلەكتروندى قۇجاتتاردى تالاپ ەتۋدى الىپ تاستاۋعا باعىتتالعان", - دەيدى اباەۆ.

ءمينيستردىڭ ايتۋىنشا، 2016 جىلى 37 ملن مەملەكەتتىك قىزمەت كورسەتىلگەن، ولاردىڭ 23 ميلليونىن نەمەسە 65%-ىن ەلەكتروندى قۇجاتتار بەرۋ قىزمەتى قۇرايدى.

"بارلىق ەلەكتروندى قۇجاتتاردىڭ نەگىزگى بەس تۇرىنە سۇرانىس كوپ. ولار مەكەن-جاي انىقتاماسى - 15 ملن، جىلجىمايتىن مۇلىكتىڭ جوقتىعى تۋرالى انىقتاما - 2,6 ملن، جىلجىمايتىن مۇلىككە تىركەلگەن قۇقىقتار بويىنشا انىقتاما  - 2,5 ملن، زەينەتاقى جارنالارى بويىنشا - 2 ملن، سوتتالماعانى تۋرالى انىقتاما - 1,4 ملن", - دەدى مينيستر.

ەندى وسىعان بايلانىستى مينيسترلىك ەلەكتروندى ۇكىمەت پورتالىنداعى ازاماتتاردىڭ جەكە دەرەكتەرى ۇشىنشى ءبىر تۇلعاعا، ياعني بانكتەرگە، ۇيىمدارعا جانە تاعى باسقالارعا قولجەتىمدى بولۋ ءۇشىن ارنايى مەحانيزمدى ىسكە قوسپاق.

اباەۆتىڭ سوزىنشە، نەگىزگى شارت بويىنشا دەلدال قاجەت بولعان انىقتامانى ازاماتتاردىڭ رۇقسات ەتكەنى تۋرالى SMS-حابارلاماسىنان كەيىن عانا الا الادى.

ايتا كەتەيىك، بۇل قازاقستان ازاماتتارىنىڭ جەكە دەرەكتەر قاۋىپسىزدىگىنىڭ ساقتالماۋىنا اكەپ سوعۋى مۇمكىن. ياعني الاياقتار قازاقستاندىقتاردىڭ جەكە دەرەكتەرىنە وڭاي قول جەتكىزىپ، ءتۇرلى كەلەڭسىز جاعدايلار كوبەيەرى انىق.

“The Qazaq Times”