رەسەي قاۋىپسىزدىك كەڭەستىڭ حيميالىق شابۋىل تۋرالى قارارىنا ونىنشى رەت ۆەتو قويدى

رەسەي بۇۇ قاۋىپسىزدىك كەڭەسىنىڭ سۇرياداعى حيميالىق شابۋىلدارعا بايلانىستى تەكسەرۋدى كەڭەيتۋ بويىنشا قارارىنا ۆەتو قويدى. بۇل – ماسكەۋدىڭ ءسۇريا سوعىسى باستالعاننان بەرى باشار اساد بيلىگىن قولداپ، قاۋىپسىزدىك كەڭەسىنىڭ قارارىنا 10-شى رەت ۆەتو قويۋى دەپ حابارلادى BBC-ءدىڭ رەسمي سايتى حابارلادى.

بۇل ءۇشىن اقش-تىڭ بۇۇ-داعى وكىلى نيككي حەيلي رەسەيدى ايىپتاپ، ماسكەۋ جاق ۇيىمنىڭ حيميالىق قارۋ قولدانۋدى تىزگىندەۋ شارالارىنا توسقاۋىل جاساپ وتىرعانىن اتاپ ايتتى. ول سوزىندە: «رەسەي حيميالىق شابۋىلعا كىم كىنالى ەكىنى تۋرالى تەكسەرۋدى توقتاتىپ، بولاشاقتاعى حيميالىق شابۋىلدى بولدىرماۋ ءۇشىن جاساپ وتىرعان ارەكەتىمىزگە بوگەت جاساۋدا»، – دەدى.

ال، بۇۇ-داعى رەسەيدىڭ وكىلى ۆاسيلي نەبەنزيا بولسا، ماسكەۋدىڭ داعدىلى جاۋابىن قولدانىپ، باتىس ەلدەرىن حيميالىق شابۋىلدى تەكسەرۋگە باتىس ەلدەرى بوگەت قويدى دەپ كورسەتتى. ول سوزىندە: «كەڭەستەگى كەيبىر وكىلدەر حيميالىق شابۋىلدى تەكسەرۋ تۋرالى ءبىز ۇسىنعان قاراردى شەتكە قاقتى. تەرگەۋ ىستەرىنىڭ توقتاپ قالۋىنا ولار مۇددەلى. ولاردىڭ بار ماقساتى داماسكىنى ايىپتاۋ»، – دەدى.

بۇدان بۇرىن بۇۇ قاۋىپسىزدىك كەڭەسى سۇرياداعى حيميالىق شابۋىلدى تەكسەرىپ-انىقتاۋ تۋرالى رەسەيدىڭ ۇسىنعان جوباسىن قابىلداماي قويعان بولاتىن. وندا ماسكەۋ تارابى تەكسەرۋدى كەڭەيتۋگە كەلىسكەن، بىراق، كوميسسيانىڭ قۇرامىن جاڭارتۋدى جانە بۇۇ بىرلەسكەن تەرگەۋ مەحانيزمى (JIM) مەكەمەسىنىڭ حان-شەيح ماڭىنان تاپقان دالەلدەردى مويىنداماعان ەدى. بۇل بىرلەسكەن مەكەمە سۇرياداعى حيميالىق شابۋىلدى انىقتاۋ ءۇشىن 2015 جىلى قۇرىلعان. اتالعان مەكەمە ءسۇريانىڭ ۇكىمەت كۇشتەرى ەلدىڭ وڭتۇستىك باتىسىنداعى وپپوزيتسيالىق توپتارعا باعىتتالعان حيميالىق قارۋ قولداندى دەگەن شەشىم شىعارعان بولاتىن.

“The Qazaq Times”